2025 AMA-ah award paruk dawngin

2025 AMA-ah award paruk dawngin Billie Eilish a langsar
Nimin tuk khan 2025 Amarican Music Awards (AMA) chu Fontainebleau Las Vegas-ah an sem a, Billie Eilish langsar berin, award pasarih a dawng a, Lady Gaga leh Bruno Mars ten award pathum ve ve dawngin an dawt. Billie Eilish hian nominate a nihna zawng zawngah award dawng vekin, chung zingah award ngaihhlut artist of the year, favorite female pop artist, album of the year leh favorite pop album telin, a hla hit ‘Birds of a Feather’ avangin song of the year, favorite pop song a dawng a, favorite tpouring artist a dawng tel bawk. Mahse, Billie Eilish hi award semnaa a lan tlat lo.
Billie Eilish hian kum kalta khan beisei phak lo deuh thil a tawng zauh zauh a, a kum fuh lo khuh nan AMA lamah a chetha ve ta a ni ber ang e. A album ‘Hit Me ard and Soft’ chu Billboard 200 (albums) chart-ah No.2 niin, a studio album tlangzarh tawh zinga No.1 kai lo awm chhun a ni a, 2025 Grammy-ah nominate pasarih neiin, award pakhatmah a dawng lo bawk.
Billie Eilish hian kum ruk kalta khan AMA new artist of the year a lo dawng tawh a, AMA new artist of the year dawn hnua artist of the year dawng leh thei pathumna a ni a, Carrie Underwood leh Ariana Grande te hnung a zui ve ta a ni.
Lady Gaga leh Bruno Mars ten award pathum ve ve dawngin, chung zinga pahnih an indawn tawm niin, an zai dunna ‘Die With a Smile’ avangin collaboration of the year leh favorite music video an dawng a, a mimal angin Gaga hian favorite dance/electronic artist a tum hnih nan dawngin, Mars pawhin a tum thum nan favorite male pop artist a dawng bawk.
Post Malone, SZA, The Weeknd, Bad Bunny, Beyonce, Eminem leh Twenty One Pilots ten award pahnih theuh an dawng bawk.
Gracie Abrams-i’n new artist of the year a dawng a, he category-ah hian nomination-ah Benson Boone, Chappell Roan, Shaboozey, Teddy Swims leh Tommy Richman te pawh an lang a, anni rualho zinga award dawn nih a nuam khawp ang! Abrams hi Grammy-a pawh 2024 khan best new artist-ah nominate a ni a, mahse, Victoria Monet-i’n award a dawng ta zawk.
Post Malone award dawn hi favorite male country artist leh favorite country song niin, Malone hian AMA panga a dawng tling ta a, chutihrualin genre chi thumah award a dawng ta a, rap/hip-hop category-ah award pahnih leh pop/rock-ah pakhat a lo dawng tawh bawk.
Beyonce ‘Cowboy Carter’ chuan favorite country album a dawng a, mihang emaw thlawhpawlh emaw zinga he award dawng thei pathumna a ni. ‘Cowboy Carter’ hian Grammy-ah pawh best country album leh album of the year a dawng tawh a, mahse, Country Music Association Awards leh Academy of Country Music Awards-ah te nomination a lang pha lo tlat thung!
Beyonce hian favorite female country artist a dawng bawk a, tihian AMA a dawn zawng zawng chu 13 a tling ta a, Rihanna nih rualin, hmeichhe zinga AMA dawn tamah pangana a ni ve ta a, Taylor Swift (40), Whitney Houston (21), Carrie Underwood (17) leh Reba McEntire (15) te chiah a pha lo.
Dan + Shay ten favorite country group an dawng a, he award hi tum nga an dawnna a ni ta a, Brooks & Dunnnih rualin he category-ah award dawn tamah pahnihna niin, he category a award 17 dawng thei Alabama chiah an pha lo.
Eminem-a’n favorite male hip-hop artist dawngin, he award hi vawi li a dawnna a niin, he category-a award dawng ngun ber a ni.
AMA host J.Lo-i’n boruak a siam
AMA host Jennifer Lopez chuan show a host bakah a perform nghal a, kumin AMA a sawi zui hlawh ber boruak a nei zui ta a, thenkhatin an fak a, a thenin an sawisel ve thung.
J.Lo hian a performance bul tan nan a backup dancer te zinga mi mipa leh hmeichhia a inchuks pui ve ve a, hei hian sawi zui a hlawh ta hle a ni. J.Lo hi kum 55 mi a ni ve tawh a, ani ang kum tawha hetianga rawn chet meh viau mai hi intihlar thar leh tumna ti pawl an awm a, thenkhatin 2003 a AMA-a Madonna-i’n Christina Aguilera leh Britney Spears te a chuks kha a rawn entawn ti pawl an awm bawk.
J.Lo hian Teddy Swims hla ‘Lose Control’ a bul tanin Bad Bunny ‘NUEVA YoL’, Billie Eilish ‘Birds of a Feather,’ Doechii ‘Denial Is a River,’ Shaboozey ‘A Bar Song (Tipsy),’ ROSE & Bruno Mars ‘APT.’ leh Kendrick Lamar ‘Not Like Us’ te pawh a perform.