67th Annual Grammy Awards chu February ni 2 hian Crypto .com Arena, Los Angeles-ah an sem dawn a, award semna show-a a perform tur an puan thar zingah Sabrina Carpenter, Billie Eilish leh Shakira an tel a, a hmain Benson Boone, Chappell Roan, Charli XCX, Doechii, RAYE leh Teddy Swims te an perform tur thu an lo puang tawh bawk.
Los Angeles chu kangmeiin tibuai viau mah se Grammy sem hun hi sawn tumna a awm rih lo a, hetihrual hian he kangmei chhuak avanga chhiatna hrang hrang tawkte chhawmdawlna tur sumtuakna remchangah an hmang dawn a, he kangmei thelhna leh midangte tanpuitu mi inpe leh huaisen te chawimawina hun an hmang tel dawn bawk a ni.
Kumin Grammy-ah hian Charli XCX-i’n nomination pariat neiin, performer tura puan tawh zingah nomination ngah ber a ni a, Billie Eilish-i’n nomination pasarih neiin, Sabrina Carpenter leh Chappell Roan ten paruk ve ve neiin, Doechii leh RAYE ten pathum ve ve an nei a, Benson Boone, Shakira leh Teddy Swims ten nomination pakhat theuh an nei bawk.
Boone, Roan, Doechii leh Swims te hi Grammy nomination-a an lan vawi khatna theuh niin, an pali hian best new artist-ah nominate an ni vek bawk.
2025 Grammy-ah Sabrina Carpenter, Billie Eilish, Shakira perform dawn
