2025 Kennedy Center Honorees George Strait, KISS & Sylvester Stallone

2025 Kennedy Center Honorees
George Strait, KISS & Sylvester Stallone
Country icon George Strait, 1970s rock veteran KISS, Broadway star Michael Crawford, disco queen Gloria Gaynor leh actor Sylvester Stallone te chu 2025 Kennedy Center Honorees an ni a, kumin February-a US President Donald Trump-a’n Kennedy Center a enkawl tan tak hnuaa honorees an puan hmasak ber te an ni. Kumin hian heng honorees puala hun an hman pawh Trump hian a host dawn tih a puang nghal a, president-in he show an host vawi khatna tur a ni. Show hi December thlaa neih tur niin, CBS-in a tichhuak ang.
Kennedy Center Honors hi a vawi khat nan 1978 khan pek tan a ni a, a dawng hmasa ber te chu contralto Marian Anderson, dancer-actor-singer Fred Astaire, choreographer George Balanchine, composer Richard Rodgers leh pianist Arthur Rubinstein te an ni.
Hun hmasa lamah chuan he chawimawina hi fine arts lamah an sawrbing deuh a, classical leh opera lam an hawi deuh ber a, mase, kum a lo vei a, huang an zauh a, genre hrang hrang an seng lut tan ta a ni. 1987 khan B.B. King chuan blues artist zinga he chawimawina dawng hmasa ber niin, genre danga a hmasa ber dang te chu- Roy Acuff (1991, country), Aretha Franklin (1994, R&B), Pete Seeger (1994, folk), Bob Dylan (1997, rock), Gloria Estefan (2017, Latin) leh LL Cool J (2017, rap) te an ni.
George Strait, kum 73, hi country artist zinga he chawimawi dawng pakuana tur a ni a, Country Music Hall of Fame-ah 2006 khan lak luh a ni tawh a, 2009 khan Grammy best country album a dawng tawh bawk. Strait hian US-a No.1 kai thei album panga a nei tawh bawk.
KISS- Peter Criss, Ace Frehley, Gene Simmons leh Paul Stanley te hi rock band zinga he chawimawina dawng thei parukna tur an ni. An band hi 2014 khan Rock & Roll Hall of Fame-ah lak luh an lo ni tawh a, Billboard 200 (US albums chart) a top 10 kai thei album pakua neiin, Hot 100 (singles) chart top 10-a kai thei hla pahnih an nei bawk.
Michael Crawford, kum 83, hian 1988 khan ‘The Phantom of the Opera’ avangin Tony Awards-ah best lead actor in a musical a dawng a, 1994 khan Grammy-ah best traditional pop vocal performance by a duo or group-ah nominate a ni tawh bawk.
Gloria Gaynor, kum 81, hian 1980 khan Grammy Award- best disco recording dawngin, 2020 khan Grammy Award- bestroots gospel album a dawng leh bawk. 2012 khan Grammy Hall of Fame-ah lak luh a ni a, 2015-ah National Recording Registry of the Library of Congress-ah seng luh a ni tawh bawk. Billboard 200 chart-a No.4 kai thei album 1979 khan neiin, Hot 100 top 10 a lang thei hla pahnih a neiin, chung zingah chuan ‘I Will Survive’ chu 1979 khan No.1 a kai nghe nghe a ni.
Sylvester Stallone, kum 79, hian Rocky Balboa lema a channa atangin Oscar nomination pahnih a dawng tawh a, Rocky film avangin best original screenplay-ah nominate a ni tawh a, Rocky hian Oscar best picture a dawng tawh bawk. Rocky original movie soundtrack “Gonna Fly Now” chu 1977 khan Billboard Hot 100-ah No.1 kaiin, 1982 khan Rocky III soundtrack ‘Eye of the Tiger’ chu he chart-ah hian No.1 a kai leh bawk.