American Music Awards (AMA) history-a award dawng hnem ber ni mek chu Taylor Swift a ni a, award 40 a dawng a tawh a, 2026 AMA nominations-ah pawh Swift bawk langsar leh berin, nomination pariat a nei a, Morgan Wallen, Olivia Dean, Sabrina Carpenter leh sombr ten nomination pasarih theuh neiin, Swift an dawt a, Alex Warren leh Lady Gaga ten nomination paruk ve ve an nei bawk.
Taylor Swift hian nomination pariat a neihnaah hian award pahnih khat chu a dawng leh dawnin a lang a, AMA dawng hnem ber record a siam pawh a rawn sawhnghet leh sawt ngei ang. AMA dawn hnem lama Swift dawttu chu Michael Jackson niin, ani hian a dam laiin award 24 a dawng hman a, Alabama (23) leh Witney Houston (21) ten an dawt ve leh bawk.
Justin Bieber pawhin kuminah nomination pali a nei a, ani hian AMA 18 dawng tawhin, kuminah award pakhat tal a dawng leh a nih chuan Kenny Rogers nihrualin, mipa lama he award dawng hnem ber dawttu a ni ve dawn a ni. Mipa lama dawng hnem ber chu Michael Jackson niin, award 24 a dawng.
Olivia Dean leh sombr te hi category pathum-ah an inel a- new artist of the year, song of the year leh breakthrough album of the year-ah te an lang ve ve a. Anni pahnih hi zaithiam lar thar, lar chak tak an ni ve ve a, kumin Grammy-ah pawh best new artist-ah nominate an ni ve ve a, Olivia Dean hi award dawngtuah a tang ta zawk. Anni pahnih bakah hian kumin nomination-a langsar deuh zingah Alex Warren, BigXthaPlug, KATSEYE, Leon Thomas, PinkPantheress, RAYE, Role Model, Sienna Spiro leh Tate McRae te pawh kumin hi AMA nomination-a an vawi khat lanna a ni.
Teyana Taylor pawh kumin hian a vawi khat nan AMA nominee a ni a, best female R&B artist-ah a lang. Ani hi kumin chu award lamah a langsar thei riau a, Oscar leh Golden Globe-ah best supporting actress-ah nominate a ni ve ve a, Golden Globe hi a dawng a, Grammy-ah pawh ‘Escape Room’ avangin R&B album-ah nominate a ni tawh a, Billboard Women in Music 2026-ah Visionary Award hlan a ni dawn bawk.
HUNTR/X (EJAE, Audrey Nuna leh REI AMI) pawhin KPop Demon Hunters soundtrack ‘Golden’ avangin nomination pathum neiin- song of the year, best vocal performance leh best pop song-ah te an lang a, an pathum hian Billboard Women in Music event-ah Women of the Year chawimawina hlan an ni bawk.
Kumin AMA hi a vawi 52-na tur a ni tawh a, Queen Latifah-i’n award semna show a host dawn a, award dawng tur hi fans vote hmanga thlan niin, voting hi May ni 8 thleng an hawng a, social song of the year leh tour of the year category bik atan chuan voting hi award sem an tan ma minute 30 thleng voting an hawng ang. Kumin AMA nomination hi March ni 21, 2025 leh March ni 26, 2026 inkara fan interaction pawimawh- streaming, album leh hla hralh, radio airplay leh tour a chat that dan atanga tehin nomination hi siam a ni.
2026 American Music Awards Nominations-ah Taylor Swift a langsar ber
