2026 Brit award nomination-ah Olivia Dean leh Lola Young an langsar
Olivia Dean leh Lola Young te chuan British pop khawvelah an rawn invawrh chhuak ta tak tak tih lantirin, 2026 Brit awards niminations-a langsar ber an ni a, nomination panga ve ve an nei. Brit award hi British rimawi khawvela chawimawina sang bera an neih a ni.
Olivia Dean, kum 26, hi artist leh album of te year bakah pop act-ah a lang a, a hla ‘Man I Need’ leh ‘Rein Me In’ te chu song of the year-ah nominate an ni ve ve bawk.
Dean hian 2023 khan a debut album ‘Messy’ tihchhuakin, a album pahnih ‘The Art of Loving’ chu nikum khan tichhuakin, hei hian rimawi khawvelah a rawn vawrh lar ta a, he album-a hlate hi hmangaihna tuipuia nuam ti taka chenna lam hawi an ni a, UK album chart-ah No.1 niin, Billboard 200 (US album chart)-ah No.3 a kai thei bawk. He album atanga a lead single ‘Man I Need’ chu UK singles chart-ah No.1 a kai thei bawk.
Dean hi February ni 28 a Co-op Live arena, Manchester-a award semnaah pawh a perform dawn nghe nghe a ni.
Lola Young, kum 25, hi artist of the year, breakthrough artist (best new artist an ti thin a, kumin atangin an thlak) bakah genre category lamah alternative/rock leh pop-ah te a lang a, ‘Messy’ hla avangin song of the year-ah nominate a ni bawk. Messy hla hi 2024-a a tlangzarh tawh kha niin, UK singles chart-a kar li a No.1 thei nghe nghe a ni.
Brit awards nomination a langsar pahnih Olivia Dean leh Lola Young te hi thla thar a sem tur Grammy Awards-ah pawh best new artist-ah nominate an ni ve ve bawk.
‘Rein Me In’ hlaa Olivia Dean zaipui Sam Fender pawhin nomination pali neiin, artist leh album of the year a lang tel a, a album ‘People Watching’ chu UK-ah No.1 kaiin, 2025 Mercury prize a dawn pui tawh bawk.
2026 Brit award nomination-ah Olivia Dean leh Lola Young an langsar
