2026 Cannes Film Festival-ah ‘Fjord’-in Palme d’Or a dawng

2026 Cannes Film Festival-ah ‘Fjord’-in Palme d’Or a dawng
Khawvela film festival ngaihhlut hlawh ber, Cannes Film Festivaal kumin atana an neih chu an zo leh ta a, kumin hi he film festival an neih vawi 79-na niin, he festival-a award ngaihhlut ber Palme d’Or chu Cristian Mungiu film siam, Sebastian Stan leh Tenate Reinsve te channa ‘Fjord’-in a dawng.
Romanian film director Cristian Mungiu hian a film siam ‘4 Months, 3 Weeks and 2 Days’ avangin he award ngaihhlut tak hi a lo dawng tawh bawk a, film director zinga Palme d’Or vawi hnih dawng thei 10-na a ni.
‘Fjord’-ah hian Stan leh Reinsve te hi Romanian leh Norwegian nupa lemah changin, a hmeichhia zawk pianna khua Fjord thingtlang khua-ah inbengbel turin an fate nen an pem ta a, mahse, nupa ngaihdan danglam tak nei nen an intawn hnuah an ruahman anga thil a kal theih tak loh dan vel te tarlanna a ni.
Russian director Andrei Zviaguintsev film siam ‘Minotaur’ chuan Grand Prize dawngin, ani chuan a award dawn lawmthu sawinaah Russian President Vladimir Putin chu indona titawp tura duhthu a sawi chhuak.
Best director dawngtu pahnih an awm a, Javier Calvo leh Javier Ambrossi ten La Bola Negra avangin Best Directir Prize an dawng a, Pawel Pawlikowski chuan Fatherland avangin Best Director Prize hi a dawng ve bawk a, German director Valeska Grisebach film siam The Dreamed Adventure chuan Jury Prize a dawng ve thung.
Best Actress dawngtu pawh pahnih awmin, All Of A Sudden changtute Virginie Efira leh Tao Okamot ten an dawng dun a, Lukas Dhont-a film siam World War One drama ‘Coward’ avangin Emmanuel Macchia leh Valentin Campagneshare ten Best Actor Award an dawng dun ve bawk.
Feature film lamah Rwandan director Marie-Clementine Dusabejambo chuan history siamin ‘Ben’Imana’ avangin Camera d’Or a dawng a. He film hi Rwandan film Cannes Film Festival-a an chhuah hmasa ber a ni.
Competition pawn lama chawimawina pek zingah Barbra Streisand chuan honorary Palme d’Or a dawng a, mahse, ani hi a hriselna avanga doctor-in zin chhuak lo tura a tih avangin a inlan thei lo va, video-message-in lawmthu a sawi a ni.