2026 FIFA World Cup Final Halftime show headline tur Madonna, Shakira & BTS

July ni 19-ah FIFA World Cup 2026 final chu MetLife Stadium-ah khelh a ni dawn a, a vawi khat nan final match-ah hian halftime show puitham tak an buatsaih dawn a, he show-ah hian Madonna, Shakira leh BTS an inlan dawn e.
Khawvela entertainment show ngaihven hlawh ber zinga mi chu Super Bowl Halftime Show a ni a, NFL final match halftime-ah show hmuhnawm tak an buatsaih thin a, hetiang deuh hian tun tum FIFA World Cup Final Halftime-ah pawh tum danga an la tih ngai loh, show an buatsaih dawn ta a ni.
Halftime show chungchang hi Coldplay frontman Chris Martin leh Sesame Street Elmo bakah Cookie Monster bakah Kermit, Miss Piggie leh The Muppets lamin an puang a, he crew inchawhpawlh nasa tak hian Kpop group BTS pawh video-in an FaceTime nghe nghe a ni.
Shakira hi chu kumin World Cup nen a hming a inthlunzawm leh sa tawh a, official 2026 World Cup song ‘Dai Dai’ chu Burna Boy nen an record a, FIFA World Cup official song a vawi hnih neihna a ni a, 2010 World Cup, South Africa-a neihah khan ‘Waka Waka (This Time for Africa)’ a lo record tawh bawk.
Shakira sawi takah chuan Las Mujeres Ya No Lloran World Tour 2026 a neih mekah July ni 14 leh July ni 20 ian New Jersey leh New York-ah show a nei dawn a, MetLife-a World Cup final nen pawh a innang tawk vel dawn khawp e.
Madonna pawhin a album thar, ‘Confessions II’ a tlangzarh dawn a, July thla hi promotion vela a buai vanglai a ni dawn a, FIFA World Cup Final Halftime show-a perform nen a inang hi promotion tha tak a ni nghal dawn. A album thar tur hi 2005-a a tlangzarh tawh ‘Confessions on a Dance Floor’ album chhunzawmna ang deuh a ni dawn a, July ni 3-ah a tlangzarh dawn a, he album atanga a lead single, Sabrina Carpenter nena an zaidunna “Bring Your Love” pawh a tichhuak tawh e.
BTS member te pawh South Korean sipai-a a nunchan zir an zo kim tawh bawk a, kumin March thla atang khan rimawi khawvelah an rawn kir leh ta a, an studio album parukna ‘ARIRANG’ an tlangzarh a nih kha. He album hi Billboard 200 (US albums) chart No.1-ah a debut a, a zawnin kar thum chhung a No.1 zui a nih kha. April thla atangin ARIRANG World Tour an nei tur Goyang, South Korea-ah an kick off a, April ni 25 atangin US-ah hmun hrang hrangah show an nei kual zak zak tawh a ni.
2026 FIFA World Cup final halftime show hi Global Citizen leh Coldplay frontman Chris Martin ten an duan vel a ni a, FIFA Global Citizen Education Fund tana sumtuak nan an hmang nghal dawn a, anni hian khawvel hmun hrang hrang a naupang te lehkha leh football zirna atan dollar maktaduai 100 tuak ngah tuma hma la mek an ni a, tunah hian dollar maktaduai 30 an tuak nga der tawha, 2026 FIFA World Cup ticket pakhat hralhna atangin dollar khat zel an dawng dawn a ni. Global Citizen leh Chris Martin te hian nikuma Club World Cup final halftime show pawh kha an lo buaipui tawh a, Doja Cat, J Balvin leh Tems an perform a nih kha.
2026 FIFA World Cup hi USA, Canada leh Mexico ten an thlengho dawn a, USA hi match dawng tam ber tur niin, final match pawh an dawng dawn a, hetihrual hian June ni 11 a tan turah hian opening ceremony pawh a hrang theuhin an nei dawn a, Mexico City-ah nei hmasa berin, Toronto leh Los Angeles-ah an chhunzawm leh dawn a ni.
Organiser-te chuan opening ceremony hi kickoff match hmalam minute 90-ah tan tur niin an tarlang a, Mexico City-ah hian an rama June ni 11, chawhhma lam dar 11:30-ah tan a ni dawn a, opening whistle an ham hma darkar 4 a la awm atangin gate an hawng tan ang a, kickoff match-ah Mexico leh South Africa te an inkhel ang.
USA lamah opening ceremony hi Juneni 12-a SoFi Stadium, Los Angeles-ah an nei ve thung ang a, USA leh Paraguay te an inkhel ve thung ang a, Toronto lamah pawh June ni 12-ah bawk opening hi neiin, Canada leh Bosnia & Herzegovina an inhmachhawn ve thung ang.
Mexico, USA leh Canada opening ceremony-ah te hian zaitham hrang hrang an perform dawn a, Mexico-ah hian Maná, Alejandro Fernández, J Balvin, Belinda, Los Ángeles Azules, Lila Downs, Danny Ocean leh Tyla te an inlan dawn a, USA opening ceremony-ah hian Katy Perry, Future, LISA, Tyla leh Anittaa te an inlan ang a, Canada-ah hian Michael Buble, Alessia Cara, Alanis Morissette, Nora Fatehi leh Jessie Reyez te an perform ang ve thung ang.