2026 She Rocks Awards a chawimawi tur zingah Rachel Platten a tel
‘Fight Song’ hla avanga hriat lar zaithiam Rachel Platten bakah Judith Hill, bassist Rhonda Smith leh guitarist Sophie Burrell te chu 14th She Rocks Awards a chawimawi tur an puan hmasak zingah an tel. She Rocks Awards hi nakkum January ni 23 khian Hilton Hotel, Anaheim, California-ah sem a ni dawn a, he award hi Women’s International Music Network sem thin a ni.
Platten hi ‘Fight Song’ avanga hriat lar a ni deuh ber a, he hle hi Dave Bassett nena an phuah dun niin, 2015 khan Billboard Hot 100 (US singles) chart-ah No.6 a kai a, Good Morning America-a he hla a perform-na avangin Daytime Emmy Award a dawng nghe nghe.
Judith Hill pawh hi zaithiam leh hlaphuah thiam, music instrument chi hrang hrang tum thiam tak a ni a, khawvela zaithiam lar tak tak Prince, Michael Jackson, Stevie Wonder leh Josh Gorban te pawh a lo thawhpui zak zak tawh a, Michael Jackson thih hmaa a concert residency ‘This Is It’-a Jackson-a duet partner tura an thlan fel tawh a. Mahse, he show hi a puitlin hmain Jackson hian mual a liam ta mai si a, Michael Jackson memorial service-ah ‘This Is It’ cast member dang te nen an perform nghe nghe a ni. 2015 khan ‘20 Feet From Stardom’ film-a a chanpui Darlene Love, Merry Clayton leh Lisa Fischer te nen Grammy Award, best music film an dawng tawh bawk.
Rhonda Smith hi Canadian bassist hriat hlawh tak niin, Prince, Jeff Beck leh Chaka Khan te pawh a lo thawhpui tawh a, 1996-a Prince album ‘Emancipation’-ah khan tel tanin, kum 10 dawn Prince hi a thawhpui zui ta a ni. Burrell hi guitarist leh social media star a ni ve thung.
2026 She Rocks Awards a chawimawi tur zingah Rachel Platten a tel
