Champion lai Argentina chu kum 2026 World Cup-a an title kawl lai humhim thei turin an ‘qualify’ fel leh der tawh a, Qatar ram World Cup-a South American team champion-puitu langsar ber Lionel Messi bawk kha Argentina tan ram pathum inthlentawm tur nakkum Fifa tournament lian berah hian kan hmu leh dawn em tih chu football khawvel zawhna lian a ni mek a, he boruakah hian Argentina coach Lionel Scaloni chuan a captain chungchanga lo za ruai lo turin fans a chah.
Thahwlehni zan khan South American World Cup qualifying match pakhatah world champion Argentina hian an thiampuipa ber Messi tel loin an thenawma football ram ropui kumhlun Brazil chu 4-1-in an sawp thei a, media tehnkhatin Scaloni team chu an superstar captain tel lo pawha ei tling turin an lo chhuah hman a, Argentina chuan Lionel Messi a mamawh tawh kher lem em ni tih zawhna mipuiah pawh an tuh thei awm e!
2026 World Cup-a kum 37 mi ni mek Messi inlan dawn leh dawn loh hi a la chiang lo a, amah, Messi ber pawhin a la sawi chiang thei lo a, thutlukna siam tura hun a la awm thu leh nuamti taka football a la khelh theih a, ram tana hnemhnanpui tlaka a la inngaih chuan thutlukna a la siam tur thu hun hmasa lamah a lo sawi tawh a ni.
United States, Canada leh Mexico ram pathumte inthlentawm tur nakkum World Cup hi a khel leh a nih chuan Messi tan World Cup-a vawiruk a inlanna a ni tawh dawn a, Argentina captain ni chunga tournament a khel leh a nih a, a champion leh phei chuan khawvela football piang chhuak tawh zawng zawng zinga tha bera ngaitu a hui hnem zual dawn!
Thawhlehni World Cup qualifying-a an mikhual Brazil an hneh hma chiah khan midang inkhel result avangin Argentina hi nakkum atan an tling a; heti a nih tak hnu phei hi chuan Messi chungchangin ngaihven a hlawh nasa zual thar lo thei lo a, a khawi lo kalna apianga media a hmachhawn tum pawhin a zawhna dawn tam ber a ni rih lo thei lo!
Chu boruakah chuan Argentina coach Lionel Scaloni a rawn tawngchhuak a, “Eng thil nge lo thleng dawn chu kan hria ang.
“Kum khat lai hun a la awm a, thutlukna siam turin hun a la tam rih e. Amahin a duh hunah tak thutlukna chu a siam mai dawn a, nakkum tournament a khelh dawn leh dawn loh chungchangah hian i zimbuai reng rih tawh lo teh ang u,” tiin a captain thlavang a hauhsak.
Tunhnai international break lai khan Argentina chuan World Cup qualifying game hnih khelin, tah chuan an an captain chhuanvawr Lionel Messi chu tihrawl hliam avangin squad-ah a tel ve lo a; an sap lal duh ber tel lo pawhin team khawng Uruguay ramah 1-0 hnehna an chang thei a, a hnu lawkah Brazil chu 4-1-in an sawp zui leh ngat a, kha kha World Cup qualifying bika Brazil tlawm nat ber tum a ni nghe nghe!
Tarlan tak angin, tumpui lian pahnih lakah Messi tel loin Argentina an chak ve ve thei a, eight-time Ballon d’Or winner tel lo pawha chak thei sawiin world champion Argentina chu an sawi hial tawh a ni!
Qatar rama 2022 World Cup title latu Messi hi tun season-ah hliam avangin a talbuai ve ta zauh zauh reng a, Inter Miami tan pawh duh angin a thawhhlawk lo ta deuh a, mahse, Argentina squad-a a team-mate rualte chuan national team-a Messi theih hun tur hi tlumtea thlir takin an thlir bang thei lo!
Brazil laka goal khat thawhtu striker Julian Alvarez chuan, “Messi chu tel ngat se goal hnih thum kan khung belh ngei ang maw le,” a ti!
Nimin lama tarlan tawh angin, Thawhlehni inkhel hmasa lamah Bolivia-in Uruguay an hneh zawh loh avangin khelmual la lut lo deuh Argentina chu Brazil an khelh hma hauhin an ‘qualify’ tih nemngheh a ni a, hlauhthawnna tel loin an mikhual palian an sawp a nih kha!
Nakkuma khelh tur 48-team World Cup-ah hian Argentina chuan point 31 hum chungin South American qualifiers standing-ah hma an hruai chhunzawm zel a; he khawmualpui atang hian direct-in team paruk an tling dawn a nih kha.
2026 World Cup-ah Messi kan hmu dawn em? Hual tuau tuau lo teh ang u – Scaloni
