‘Hun her zel hian mual min liampui’ tih hla kan sak thin ang deuh khan World Cup kal mek paw’n min liampui zel a, quarter-final lut team pariatte atanga match 4-te pawh khelh zawh vek a ni tawh a, tunah chuan WC match en tur a tlem sawt ta hle.
Semi-final match hnih – France vs Spain leh England vs Argentina, 3rd place match leh grand finale match, a vaiin match 4 chauh en tur kan nei ta a, a uiawmin a ngaihawm dawn khawp mai.
WC lehpek chu kum sul vawi 4 zet vei hnuah a lo lang leh chauh dawn a ni si a, chumi chu tlumte thlira kan lo thlir leh veng veng a ngai dawn a ni.
WC lehpek chu tuna ruahman lawk danah chuan ram (country) 3 – Portugal, Spain leh Morocco-te’n an inthlentawm ve thung tawh ang.
Portugal leh Morocco hian WC an thlen vawi khatna tur a ni ang a, an phur lawk khawp ang.
Spain erawh chuan kum 1982-a an lo thlen tawh nen vawi 2 an thlenna tur a ni ve thung tawh ang.
Aw le, chuti lam chu duhtawk phawt ila, grand finale zawh lamah chipchiar takin kan thlir ho leh zawk dawn nia.
Tun tum WC quarter-final inkhelte chu kum dang ang lo takin inhnehtawk vanga penalty shootout-a inhneh an awm lo a, France-in regulation time chhungin 2-0 zetin a hneh a; Spain-in Belgium kha 2-1-in an hneh ve bawk.
Right flank lamah ve thung chuan Norway vs England kha 1-1 draw niin, AET (After Extra Time) chhung hian Bellingham-a goal thun belh chu English hoin chakna’n an hmang ta.
Chutiang bawkin Argentina vs Switzerland pawh 90+ ah 1-1 ve vein extra time an lut a, tah chuan 3-1-in Argentina an chak ve bawk.
Tuna semi-final khel turte hi Argentina tih lo chu European ram an ni vek hlawm, a all European semi-final leh teuh khawp mai.
WC hi Europe continent chhunga awm chang hian a all European semi-final chawk thin. E.g. 2006 Germany-ah leh 2018 Russia-ah kan hmu a, a dang dangah pawh tarlan tur a awm nual.
Tunah erawh hi chuan WC hi North America rama khelh a nih vangin Argentina hi semi-final stage-ah an rawn inzep ve ta tlat mai a, chu vang chuan an tlang a rinawm ta khawp mai!
Europe ram pawna WC a awm changin South American ramte hi an champion chawk thin kan tih tawh kha. Chumi nena inzawm World Cup chronicle an tih chu final dawnah chipchiar takin kan la thlirho dawn nia.
Tun tum quarter-final match pakhata France leh Morocco inbei kha mite’n champion tura an lo rinlawk deuh hlek Morocco chu si hnih fai zet phurin an tlawm ta hlauh mai a, two times champion Les Bleus bawkin semi-final an rawn lut leh ta a, an champion thleng an khel ang em tih chu mi rin dan a ni leh ta.
Mbappe-a’n goal khatna a receive kha a team-mate Rabiot-a’n handball chunga a pass phei a ni a, amaherawhchu, ngaihsak hlawh loin, VAR pawh rawn loin goal-a pawm a ni ta.
Mbappe-a’n penalty a pet khan a pet thiamna zawng ama veilamah na takin (Argentina vs France 2022 final ang khan) pet mai se Morocco keeper khan a save lo ang, a style a han thleng kual vel a tuar ta a nih kha!
Spain vs Belgium kha han chhui chiang ila, Spain thiampuipa Mikel Merino kha a tawp dawn tepa goal thun kha a chem kalna zawng a ni tih kha Belgium ho khan lo study lawk deuhin, lo veng tha se lang chuan an penalty shootout mai thei!
Vs Portugal-ah pawh khan hun tawp dawn tepah tho a rawn thun kha. Hemi tak hi semi-final lamah pawh France ho hian an hriat a tha ang.
Right flank lama Norway vs England-ah kha chuan Norway ho thiampuipa Haaland khaidang angin a che thei hauh lo mai. A chhan ni awma lang ber chu Haaland hi a football career hun chhung zawng England ram chhung (Epl)-a lo chetla thang a nih vangin England ho khan a chet dan an man chiang hle a, crossing leh minus ball atanga a goal thun dante chu hre rengin chance an pe lo a, an guard hne hle a nih kha. Chu a chhapah a han inhliam titih leh nghal a!
Haaland khan goal khat tal thun se lang chuan an penalty shootout ngei a rinawm. An Viking ho hlapui ‘row row’ chuan semi-final a luh pui zo ta lo a ni.
Comment:
England ho 2nd goal kha England striker-in goal a rawn shot keeper-in man nghet loin a ti per chhuak leh a, chumi tak chu Belingham-a’n rang zet maia lo chharin, goal-ah a khung lut ta a ni.
Kha kha keeper thiam loh vang a ni. Keeper-in kan hriat reng tur chu khatiang huna attacking team-in min raw push rawn huai huai laia shot a awm chuan ti per lova nghet taka ball chu kuah beh tlat tum hram tur a ni. Rebound ball hi last minute-ah phei chuan a danger leh zual.
Khawvel mipui hot favourite Argentina vs Switzerland chuan fans lung an ti phu nasa dup dup ngei mai!
Argentina ho chin dan an sim theih miah loh chu an khingpuite si hnih khat an phurhtir tawh chuan inthladah angin an awm a, chu mi chhung chuan an khingpuite’n an si phurh an rawn tlak (equalise) leh thin a, nasa taka an fight back a ngai leh thin.
Tun tum vs Switzerland pawh khan 90+ ah pawh 1-1 kha an fill up zo thei lo a nih kha.
Switzerland hoin red card hmu lo phei se lang chuan Swiss attack kha an dang zo thei ang emaw tih turin an awm a, fan-ho rilru an chawkbuaiin, thin an ti phu nasa khawp mai!
Comment:
Switzerland ho striker duhawm tak mai Embolo (No.7)-in red card a hmuh chungchangah khan controversy a tam khawp mai a, ‘a tlu zawk, foul tuartu zawkin red card a hmu hlauh zawk a nia’ tia sawichiar a tam hman khawp mai na, fiah takin i han sawifel teh ang.
Embolo tluk dan kha fiah taka VAR-in a han enchian meuh chuan opponent team Argentina player khan a khawih fuh hauh lo a, mahse, free kick a beisei vanga tlu der a ni tih man chian a nih hnuah ‘simulation offense’ hmanga hrem niin, unsporting behaviour puin yellow card phawrh khum a ni ta a, a hmaa yellow card hmu sa a lo ni bawk nen double yeallow card = red card a rawn ni chauh zawk a ni.
A tluk derna ‘simulation offense’ hmang ringawt kha chuan direct-a red card pek theih a ni lo a, double yellow card vanga red card hmu chauh a ni zawk.
Semi-final lamah Argentina-in England an hmachhawn dawn a, eng result tak paw chhuak ang maw…
England nen hian WC-ah vawi 5 lai an lo inhmachhawn tawh a, chu’ngte chu:- 1962, 1966, 1986, 1998 leh 2002-te kha a ni a; heta tang hian Argentina ho hian vawi 2 (1986 & 1998) an lo hneh tawh a, tun tum hi an intawn vawi 6-na tur a lo ni ta.
Fixture draw-ah khan England ho hi semi-final lut hmasa an nih avangin an team hming ziah hmasak a lo ni a – ‘England vs Argentina’ tih a ni.
Chuvang chuan England ho hian semi-final an khelh ni hian an duh ber uniform hak an thlang thei a, Argentina ho chuan away uniform blue suit an hak a tul ta tlat mai.
WC thuthlunga thil mak ve tak chu Argentina ho hian a bik takin final niah an uniform chhuanvawr sky blue + white stripes an hak apiangin an chak a, rawng dang an hak apiangin an chak lo!
E.g. blue + white an hak loha an chak loh tum:- Italia 90 vs Germany, vs Germany 2006, vs Germany 2014 etc. te an ni a, final ni loah chuan sky blue + white stripes an hak loh paw’n an chak thin ve tho mai. E.g. Vs England 1986, vs England 1998, vs Poland 2022 leh tun WC 2026 te hi an ni a, hemi chungchang hi ni dangah chipchiar takin kan la sawi ang.
NB: Fixture draw-a team hming ziah hi fimkhur taka ziah thin tur a ni. Team next match tura rawn lut hmasa sa kha team hming ziah hmasak thin tur a ni.
Eg. France vs Spain chu a box chhunga kan ziah chuan France kha a chungnung zawk tur a ni a, Spain vs France tih zawngin kan ziak tur a ni lo; a chhan chu team hming ziah hmasak/ a chung lam zawk kha uniform choice right team privilege ropui tak pek an ni a, an khelh ni turah France-in uniform duh ber ha turin duh an thlang thei a ni, chutiang bawkin England vs Argentina-ah pawh.
Tunah zet chuan WC match en tur kan nei tlem ta hle mai a, semi-final pahnih, third place match leh Grand Finale-te chauh an nih tak avangin a awmchhunte hi duhtui tak leh am takin i thlirho leh phawt ang u, World Cup kan thlahliam tep a ni mai dawn si a…
2026 World Cup thunawi lawrkhawm (A hmawr bawk hun kan hnaih ta!) – Jipson S. Hrangate (AFC Referee)
