2029 atangin YouTube-in Oscar show an chang tawh dawn
Khawvela lemchan lama chawimawina sang bera neih Academy Awards, Oscar Awards an tih bawk chu kum 2029 atang chuan award semna show tichhuaktu-ah YouTube a tang tawh dawn. Oscar hi 1976 atang khan ABC-in an la tichhuak ngar ngar a, mahse, 2029 atang chuan streaming platform lamah an insuan dawn ta a ni.
Oscar hian 2028-ah kum 100 a tling dawn a, a kum 101-na atangin YouTube hian a show tichhuaktu nihna an chang dawn ta a, 2033 thleng show tichhuaktu nihna hi an chang ta a ni.
Academy chuan social media lamah thuchhuah siamin, “Film tana zan ropui ber chu @YouTube lamah a kal dawn ta,” tiin Oscar award leh YouTube logo an dah dun a, “2029 atangin” an ti bawk.
ABC hian Oscar telecast rights hi 2028 thleng a la nei a, 2028 hi Oscar kum 100 an semna tur chiah a ni bawk a, 2029 atang chuan khawvel hmun hrang hrang atangin YouTube-ah a ‘free’-in Oscar show hi a en theih tawh dawn a ni.
Oscar semna show mai bakah Google hnuaia awm YouTube hian pre-show red carpet coverage, behind-the-scenes in-show content te pawh an tichhuak dawn a, hei bakah hian Oscar nominations an puanna show te, Governors Awards (hetah hian Academy-in honorary Oscars an sem thin) leh Oscar Nominees Luncheon te pawh an tichhuak dawn a ni.
2029 atangin YouTube-in Oscar show an chang tawh dawn
