2030 leh 2034 World Cup thlengtu tur an puang

2030 leh 2034 World Cup thlengtu tur an puang
Arab ram zingah Qatar dawta Fifa World Cup thleng leh thei hmasaber ni turin Saudi Arabia chuan kum 2034 khian men’s soccer World Cup an dawl dawn a; chu mi hma chiaha tournament thlengtu tur pawh Fifa-in puang fel nghalin, kum 2030 edition chu Spain, Portugal leh Morocco-in an inthlentawm dawn bakah South American ram pathumah match khat theuh khelh kual a ni bawk ang.
Nilaini khan Fifa chuan kum 2030 leh 2034 World Cup thlengtu tur ramte hi a nemnghet a, online kaltlanga Fifa inkhawmpui lian (virtual Extraordinary Fifa Congress meeting)-ah an thutlukna hi Fifa president Gianni Infantino chuan a puang.
Video link kaltlanga thu a sawiah Infantino chuan ram engemawzata khelh kual dun dun tur 2030 World Cup chungchang bik sawiin, “Ram tam zawkah football kan chhawp dawn a, tournament khel tur ram pung chho tur hian quality a pawlhdal dawn lo mai ni loin World Cup hlutna, daihzaina leh a quality a belhchhah zawk dawn a ni,” a ti.
Kum 1930 kha Uruguay rama World Cup hmasaber an nghah kum niin, 2030 World Cup hi he tournament-in kum 100 a tlinna tur chiah a nih avangin tournament centenary lawmna kalpui a ni dawn a, 2030 World Cup inthlentawm tura Morocco, Spain leh Portugal thlan an nih rualin tournament hmasaber nghahna Uruguay bakah South America khawmualpui ram dang pahnih Argentina lehParaguay-ah centenary lawmna’n match khat theuh an nghat kual dawn a ni.
Heti a nih takah chuan Portugal, Paraguay leh Morocco-te hi a vawikhatna’na Fifa World Cup thleng tur an ni.
Kum li a liam leh hnuah Saudi Arabia chu kum 2022 edition thlengtu thenawm Qatar tih loha Middle East ram zinga World Cup thleng leh thei hmasaber an ni ang.
Nikum khan Fifa chuan thuchhuah siamin, 2034 World Cup hi Asia a nih loh chuan Oceania region lamin an thlen tur thu a lo puang lawk tawh a; inthlentawm tum ve uaih uaih hman Australia leh Indonesia inhnuhdawh hnuah Asian Football Confederation thlawp Saudi-in an chang ta a ni.
2034 men’s football World Cup thlengtu tur Saudi Arabia hi Muslim ram niin, mihring dikna palzut kawngah Qatar ang thoa sawisel hlawh an ni a; tuai leh patil bakah nihna inthlakho (transgender) pawh an pawm lo a, zu an do hle bawk a, a in leh kawl an mante chu pawisa chawitir, lung ina khung leh an rama thawnhaw thlengin dan khauh tak an nei a, khawvel hmun hrang hrang atanga fans fuankhawm tur tan an nelawm loh nghal ul a ni!
Chutih laiin, sum an nei a, bakah tournament laiin an ramah eng mi pawh an zalen vek dawn tih nasa takin an puangzar dum dum a, tuai leh mawngkawhur pawh an tai an tai dawn lo a nih hmel takah chuan Fifa member ram 211-te chuan vote hmangin an thlang tling ta a ni!
Fifa secretary general Mattias Grafstrom chuan an member association neih zawng zawng (211)-in vote an thlak kim tih a sawi.
Oil ngah lalram Saudi Arabia hi human rights record an neihchhiat piahlamah environment chhe zela mawhphurtu liana puh an nih ve reng avangin sawisel hlawh thin an ni a; 2034 World Cup an thleng dawn tih puan a nih rual khan Amnesty International lam chuan Fifa thutlukna an rawn dem nghal chat reng a, pawl dangte nen thuchhuah intawm siamin, human rights protection kawnga an record chhia avangin tournament lian an thlen tur kaihhnawihah mi tamtak nunna a derthawng thei tih an puang nghal.
Amnesty International hnuaia labour rights and sport hotu lu ber Steve Cockburn chuan he rama hnathawktute chu an dikna rahbehsak chungin an arte thih mai mai tih evidence chiang tak tak hmuh tur awm reng chunga Fifa thutlukna chu mak an tih thu a sawi.
Football Supporters’ Association lam pawhin Saudi Arabia rama supporter-te tawnhriat chhe tak tak chu fans lamin an hre reng chunga thlan an ni chu hriatthiam harsa niin an sawi ve bawk.
LGBT+ supporters phei chuan nasa lehzualin Fifa thutlukna hi an dodal!
Fifa president Gianni Infantino pawhin sawiselna leh duhlohna thawm an hai bik lo tih sawichhuak chungin a thlengtu ram lakah rinna an nghat tih a sawi a, human rights leh an tualzal nunah pawh tournament an thlen hma ngeia hmasawnna hmuh an inbeisei thu a sawichhuak ve nghal hial a ni.
Saudi sports minister Abdulaziz bin Turki Al Faisal chuan an rama tournament khel tur leh chhim turin eng mi pawh an ‘welcome’ vek tih a sawi a, 2022 World Cup laia an ram thenawm Qatar-in ram dang atanga hna thawk tura an sengluhte a ngaihsak lo leh a hlamchhiah em em ang kha an ramah an thlentir ve dawn lo tih a sawi bawk.
Saudi Arabia-ah hian stadium 15 an chhawpchhuah tur zingah pali chu an sa zo tawh a, a dang sak tur an la ngah a, oil vanga ram hausa dangte ang bawkin hnathawk tur hian ramdang mi an chawlut ve teuh dawn a, Qatar ang bawka sawihlawh an ni ve dawn nge dawn lo kan la hria ang chu!