3 Doors Down lead singer Brad Arnold a thi

3 Doors Down lead singer Brad Arnold a thi
3 Doors Down founding member leh an lead singer Brad Arnold, kum 47, chu kal (kidney) cancer avangin a thi. Brad Arnold hian nikum May thla khan stage 4 kidney cancer a neih tih an hriat chhuah thu a puang a, an rama February ni 7 khan a nupui Jennifer leh amah hmangaihtu ten an bawihsawm laiin thlamuang takin a kal ta niin an band official Instagram-ah an tarlang.
3 Doors Down hian May 2025 kan Arnold-a’n stage 4 kidney cancer a nei tih hriatchhuah a nih thu an puang a, an band pawh summer tour neih tuma an lo inpuahchah tawhna zawng zawng an cancel nghal vek. Hemi tuma video an post-ah chuan amah, Arnold ngei hian a natna chungchang hi a puang a, clear cell renal cell carcinoma a neih thu leh a chuap (lungs)-ah te a darh tawh tih a sawi.
Arnold chuan, “Ka zam lo. Ka hlau lo a, ka zam lo tak zet a ni,” tiin fan-te chu tawngtai pui turin a sawm a, “Min hriatchhuah chang apiangin min lo tawngtai pui ve thin ula ka lawm ngawt ang. Tunah chuan ‘It’s Not My Time’ tih hla kha ka ngaihthlak phawt a ngaiin ka hria,” a ti.
Mississippi a piang, Arnold hian 1996 khan 3 Doors Down hi a high school thiante- guitarist Matt Roberts leh bassist Todd Harrell te nen an khua Escatawpa-ah an din a, Arnold chu an band singer leh drummer angin a awm nghal a, a kum lehah an demo ‘Kryptonite’ an record a, he hla hi high school a kal laia Arnold phuah a ni. An khaw radio station velah chuan he hla hi an tilar ve viau a, record label lian lamin an hmelhriat phah ta a ni.
2000s kha an vanglai a ni a, 3 Doors Down hian Billboard Hot 100 chart-a top 10 kai thei hla pathum an nei a, chung zingah chuan ‘Kryptonite’ pawh hi telin, No.3 a kai a, 2003 khan ‘When I’m Gone’ chu No.4 an kaipui a, 2003-ah hian ‘Here Without You’ chu No.5 an kaipui bawk. An band hian Billboard 200 (US albums) chart-a No.1 kai thei album pahnih- Seventeen Days (2005) leh ‘3 Doors Down’ (2008) te an nei bawk. 3 Doors Down ang hian Grammy nomination pathum an nei hman bawk a ni.
3 Doors Down hian 2011 khan ‘Time of My Life’ album an tlangzarh a, hei hi Arnold leh original member dang Roberts leh Jarrell te anga an album hnuhnung ber a ni ta a. Guitarist Roberts hian 2012-ah taksa hrisel lohna avangin band a chawlhsan a, ani hi 2016 khan drug overdose-in a boral ta. 2013-a lirthei khalh fimkhur loh vanga police ten an man, vehicular manslaughter charge zui tak bassist Harrell chu band atangin an chhuah tir ve leh ta bawk. 2016 khan ‘Us and the Night’ album an tlangzarh a, hei hi an studio album hnuhnung ber a ni ta a, chumi hnuah an la tour regular zel tho a ni.
Arnold hi a nupui Jennifer tana inpe zo tak, mi ngilnei, fiamthu duh leh thilphal, amah hrechiangtu ten an ngainat em em vek niin band chuan an tarlang a, sakhawmi tak a nih bakah chhungte leh thiante hmangaih mi tak a ni bawk.