33rd OLYMPICS PARIS 2024 MANG|HA LE…
(Adieu Jeux Olympiques De Paris 2024)
Khawvel infiamna chi hrang hranga intihsiakna ropuiber Olympics a vawi 33-na Paris khawpuia thla chanve aia rei (26th July-11th August, 2024) kal mup mup chu 11th August 2024, Sunday zanlai pelh dar 12:30 khan variety show ropui tak nen khar a lo ni ta…
Hemi timing Olympics Paris 2024 thlahliamna kan rawn tarlan hmasak khan 8:30pm tih mi kha India hun ni loin Paris timing zawk a lo ni a, keini ramah chuan Sunday zanlai pelhah kan en thei chauh a nih kha.
Olympics Garden (park)-ah French nula zaithiam Jessie J an tih chuan mawi taka Olympics thlahna hla sain, chumi zawhah French Swimming icon Leon Merchand-i chuan Olympics Meicher, Olympics chhung zawng zawnga alh reng chu laltin te (electronics lantern) remote control hmangin a rawn chemmit ta ruai ruai a ni.
Chumi zawhah closing ceremony program chu ennawm mawi tak tak nen hman a ni a; Paris Olympic 2024 Organising Committee chairman Pu Tony Estanguet chuan Paris 2024 chhimtute zawng zawng chungah lawmthu sawiin, France rama an awm chhung zawnga inhmangaih dial dial leh lungrual taka an khawsa tlang chu mawi a tiin fakawm a tih thu hahipin a sawi.
Tin, Olympic boruak chhunga lo in-star hman engemawzat zinga ‘inhualna’ (marriage proposal) lo siam lawkte chungah pawh lawmthu a sawi tel nghal a, he thil hian Olympics hi lawmna ni, inthianthatna, inunauna etc. a ni tih a tilang chiang hle tih a tarlang tel bawk.
International Olympics Committee (IOC) chairman Pu Thomas Bach chuan Olympics Paris 2024 chhimtute zawng zawng, a biktakin, infiammi (athlete) te, ram buai tak tak karah pawh Olympics spirit diktak pu-a Olympics games khel tura chhuakkhawmte a fak a, “In titha thlawt mai, khawvel ram leh ram kara buaina(conflict) te hi Olympics Committee tihreh theih chi a ni lo a, infiammite leh a chhimtu (spectator)-te inhmangaihtawn dial dial chunga in thawhona hi remna leh muanna siamtu hmanraw pawimawh tak a ni zawk,” tiin infiammite leh a chhimtute chungah lawmthu a sawi.
Hun tawp lamah Los Angeles, USA-a nghah tur Olympics 2028 puala hun tawi hman niin, IOC chuan USA hnenah Olympics Flag a hlanchhawng (relay) a, online technology hmangin Los Angeles khawpui tuipui kama an lo dawngsawng lai tihlan niin, USA band hmingthang/lar tak mai ‘Red Hot Chillie Peppers’ hoin mawi takin zaiin an lo awi.
Comments on Olympics 2024:
1. Olympics Park-a Olympics Flames awm flame-bowl leh hot-air balloon eng reng kha French swimming icon Leon Merchand-i’n electronic lantern (laltin) te hmanga a rawn tihmih hnuah kha mi laltin vek kha stadium chhunga rawn kenglut lehin IOC chairman Pu Thomas Bach-a’n hun tawpa Olympics 2024 kharna’n a rawn tihmih leh kha a chuangtlai deuh mai mai lo maw?!
Dik tak chuan Olympics Flame hi closing ceremony neihna hmun stadium sir/chungah dah a ni thin a, hun tawp bera tihmih a ni thin si a; tuna an tihdan hi chu a dangdai ve khawp mai tihsak mai teh ang!
2. Olympics meichher kan sawipawp laklawh bawk a, han tuihnih lawk ila.
Olympics awm tawh zawng zawnga Olympics Flames chhit kai dan mawi ber la ni reng chu 1992 Barcelona Olympics opening ceremony neih lai stage-a Spainish thal kah thiam Antonio Rebollo’n thalmu hmawra chhit Olympics meichher kap chhuaka meter 100 vela sanga dah Olympic Flame Bowl-a a han kahluh chaih kha a la ni. Kha thiam thil (feat & skill) turu tak kha world record-ah pawh ‘most accurate shot’ tia chhinchhiah a la ni reng!
3. Closing ceremony-ah khan athletes/contingent-ho kha stadium chhungah an rawn parade hnuhnawh a!
Dan angin Olympic chingchhuaktu Greece-in hma an rawn hruai na a, a zuitu chu alphabetical order ni tawh loin champion USA-in an rawn dawt thung!
Opening ceremony ang lo taka stadium chhunga contingent parade an ti law law a nih chuan an medal dawn dan milin ti mai se a mawi zawkin a rinawm.
4. Lawmman (medal) sem hnuhnung ber chu closing ceremony kalpui laia stadium chhunga marathon race hmanga medal dawngte kha an ni.
He mite hi Games khelh lai final ni khan an ti nghal thin kha a ni a, closing ceremony-a medal tlem-a-zawng han sem loh em em chu an ti a ni fa hmiang!
5. IOC official-te stage-a an lawn dawna continent tina mi (hnam) hrang hrang an chhawm chhohte kha khawvela continent tin – North & South America, Europe, Africa, Asia, Australia, Refugee Athletes team-te entirna a ni a, a mawi angreng khawp mai.
6. Olympics Flag an relay kha Olympics symbol(rings) pangate an rawng dik tak – a pawl, a dum, a sen, a eng, leh a hringte an pholanna a nih avangin a mawi khawp bawk mai, Olympics Spirit diktak a nih vangin.
Los Angels Olympics 2028-ah pawh hemi rawng dik tak vek theuh hi inkhelhna hmun apiangah tihlan ni tawh se a tha ngawt ang.
7. Closing ceremony laia stadium chhunga athletes/contingent-te’n an medal dawn an tihlan theuh laia QUEEN band hla mawi tak mai ‘We are the champions’ background music an rawn play tuma athlete hoin hlim taka an lo zawm rual dur dur kha a mawi kher mai!
Hetiang tihna hmuna he hla play hi a inhmeh/inmawi em em tih khawvel mipui hian kan hrechhiang tawh hle a ni. Tun tum Euro Championship ceremony-ah pawh an play kha…
8. France hi khawvela ram hausa/changkang berte zinga mi a ni a, Olympics pawh hi vawithum lai a lo host tawh nghe nghe a ni.
Infiamna khawvel (world of sports)-ah hian a thawhhlawk em em a, Olympics muthlu tawh hnu rawn kaitho (tungding) lehtu pawh French pachal Pu Baron Pierre De Courbertin a ni.
FIFA President hmasaber pawh Pu Robert Guerin, French mi bawk a ni a; World Cup football dintute pawh French pachal ve ve Pu Jules Rimet leh Pu Henri Delaunay-te an ni lehzel a; hmanni lawka kan thlahliam tak Euro football pawh kha French mi bawk Pu Henri Delaunay-a din/hmuhchhuah ngat a ni bawk.
Khawvela mega sports kan sawite khi a vaiin France ram hian a thleng kim vek tawh a – facilities & infrastructure, food & lodging leh hawihhawmna (hospitality) lam thlengin an tlinin an hnehsawh em em thin a ni.
Tun tum Olympics-ah pawh khan chhimtute zinga mi engemawzat lo in-star hman lehpek hote pawhin Olympics zawh veleh ‘tiam tlat e’ tih zai an rel hlawm dawn a niawm a; an ram mawina, duhawmna leh romantic-na hian he rama hmelhriat loh chhingkhual tlalutte inkarah inhmelduhna han tih angte pawh kha a thlen awlsam deuh a ni mahna le!
Chuvangin, khawvel mipui hian infiamna lama French-ho thawhhlawkzia hi hriain, an chunga lawmthu sawi mawlh mawlh hi kan ba nasa em em a ni.