38th National Games hmeichhe hockey:
Mizoram leh Manipur insualtawk
Haridwar-a nimin pool match inkhelah sihnih ve ve thunin Mizoram leh thenawm Manipur an inhnehtawk.
Mizoram hi an khel tha a, tunhma lama la khel ho ngai lo leh tournament la hmachhawn ho ngai lo ni mah se an in man a, an goal bawh pawh a na a, engkimah chungnung mah se goal thun kawngah erawh an vanduai a ni.
1st quarter-ah Manipur lamin an ti goal hmasa a; an goal luh dan hi replay en tur awm se chu goal-a pawm a ni lo ang.
Meitei hoin D line pawn atanga an vuak luh chu Mizoram player-in lo dang perin goal-ah lut a; kha kha long corner tur nih laiin referee-in Manipur tih goal-ah a ngai tlat a, han complain eltiang mah se replay en tur awm lo ta chu goal-ah an pawm zui ta mai a ni.
2nd quarter-ah Mizoramin an nawr a, F. Lalbiaksiami’n nalh takin goal hnih a thun zawn thawt a, Mizoramin hma an hruai.
2-1-a Mizo team an chungnun hnu hian Lalrinpuii leh Manipur player-in green card an hmu a, chumi hnu lawkah Lalrinpuii’n yellow card a hmu zui leh a, Mizoram hi player pakua chauh an ni laiin Manipur lamin na takin an nawr a, remchang an hmuh hlah duh loin an sipurh an sut ta hlauh a ni.
3rd leh 4th quarter-ah Mizoram hian goal khung ngei tumin nawr na viau mah se goal an hlawhtling zo lo a, penalty corner vawiruk ngawt an chhawrtangkai lo kha inthlakna pindana Mizo nulate ui a tling khawp ang le!
Mizoram hian naktuk pool match dangah a thlengtu Uttarakhand an tum leh ang a; February ni 9-ah Maharastra hmachhanwin, February ni 10-ah Jarkhand an su zui leh dawn a ni.
Vawiin, February ni 6, 2025, Ningani hian National Games kal mekah taekwondo atangin Lalthlamuanpuia, Venghlui chuan Individual Poomsae quarter final a khel dawn.
Muanpuia hi National Games hnuhnung ber Goa-a silver medal latu kha a ni a, tuntum pawh hian a tisual viau a nih loh chuan Mizoram tana medal awrh leh ngei tura beisei a ni.
Vawiin vek hian taekwondo-ah Mizoram tana khel thin, SSCB player ni chunga Uttarakhand lama inlan ta Nareah Singh chuan Kyorugi Under 87kg huangah quarter-final a khel ve bawk ang.
38th National Games hmeichhe hockey: Mizoram leh Manipur insualtawk
