3rd round lut Swiatek leh Raducanu

3rd round lut Swiatek leh Raducanu
Ningani kha Melbourne Park-a 2025 Australian Open khelh mek ningana niin, hmeichhe singles lama second round paltlang langsar zingah Grand Slam title la tawh ve ve Iga Swiatek leh Emma Raducanu an tel.
Grand Slam-a vawinga champion tawh Swiatek hian Rod Laver Arena-ah 6-0, 6-2-in 2022 Australian Open semi-finalist Slovak Sramkova a sawp a, US Open champion hlui Emma Raducanu nen third round lamah an insu zui leh dawn a ni.
Nikum kum tawp lam khan Swiatek hi damdawi hman khawloh endikna chungchangah thla khat hrem a ni a, chu chuan ranking lama dinhmun pawh pawthniam hretin world number two-ah a chhuk a, Australian Open kaltlangin number one zinkawng a zawh tan leh mek a ni!
Polish Swiatek-i chipui Hubert Hurkac erawh 18th seed ni chungin Serbia player hriat hlawh lo zawk Miomir Kecmanovic lakah straight sets hmangin a tlawm thung.
John Cain Arena lam inkhelah Hurkacz hi a kephah veilam hliamin a tibuai a, Polish fans thawm na tak hmaah a duh angin a che thei lo a, Kecmanovic chuan 6-4, 6-4, 6-2-in a hnawtchhuak ta a ni.
Ningani second round matchdangah Emma Raducanu chuan Amanda Anisimova of US laka 6-3 7-5 hnehna chang hramin round thumna a lut.
2021 New York trophy a lak hnua hliamin a tihbuai tawp hleih theih loh Briton Raducanu hi set hnihna tir lamah khel bawr na bawkin a tibuai leh a, off-court medical timeout koh ngai khawpin a na a, chuti chung chuan hnehna a sualchhuak hram a ni.
Swiatek laka chona lian zawk a hmachhawn chungchang inkhelh banah sawichhuakin, a chak tawh thu leh a game dik tak fiahna atan pawh a duh ve reng reng thu a sawi.
Tun kha Raducanu tan Melbourne khaw tournament liana third round a thlen vawikhatna niin, a tum leh tur Pole chu he hmuna hlawhtlinna lian lo sualchhuak tawh a nih avangin an inhmachhawn hunah pawh a tan bik chuan han hloh leh chuan tur a awm loh avangin hlauhthawnna nena inkhel tur a nih loh thu leh a theihtawp chhuah tura khelmual a luh mai tur thu a tarlang tel.
Third round lut langsar zingah African leh Arab hmeichhiate zinga major title la hmasaber nih la tum zui zel Ons Jabeur pawh telin, second round match a khelhpui Colombia nula Camila Osorio lakah 7-5, 6-3-in a chak a, mahse, he match-ah hian medical timeout neih ngaiin a khawsa a, a awm bawr dawm chunga a khuh lai hmuh tur awmin, a mittui far kan thlirliam bawk!
Jabeur-i kha a lan dana a sek tung ang a ni lo a, tun aia a la naupan zawk laia ‘asthma’ lo vei tawh a nih avangin a second round match-ah pawh khan thawk lamah harsatna a tawk leh deuh a, kha vanga lungngaia mittui tlat pawh a ni reng a; a fitness pawhin a tuar avangin world number two hial lo ni tawh hi tunah world number 39-na daih ni tawhin, thawk lama a harsatna bakah hliam dang neuh neuhin a tlakbuak chho ve reng bawk.
Nikum khan dar na avangin US Open telin tournament engemawzatah a inlan thei lo a; khup hliam avangin Paris Olympics-ah ram tan a theihna a hlan thei lo bawk.
Chuti nuai chu a nih avangin nikum September thla khan a season a tawp fel der tawh a, kuminah khelmual a lut leh thei chauh a, mahse, a asthma lang leh thei reng a nih avangin a lungngai tih a thup zo lo a ni ber!
Aran leh African hmeichhe zinga Grand Slam title la thei hmasaber nih a tumna kawngah vawithum ngawt final thleng tawh mah se hmawrbawkna inkhelhah a vanduai zel a, tum thum lai Grand Slam runner-up ni tawh hian kuminah a tum a hlenchhuak zo dawn em tih sawi theih a ni lo a, thawk lama harsatna a tawk chho leh deuh dawna a lan bawk si avangin a lunghnur viau niin a lang!
Ons Jabeur hi Wimbledon bika final vawihnih lut tawh a ni a; 2020 Australian Open-ah pawh quarter-finalist ni ve tawhin, kumin hian third round-ah American eighth seed Emma Navarro a tum leh ang.
Ninth seed Daria Kasatkina pawh next round lut zingah inhlangkaiin, Wang Yafan lakah 6-2, 6-0 hnehna nuamsa a chang a; second round inkhel dangah Dayana Yastremska pawhin 6-0, 6-1-in Danka Kovinic a sawp ve bawk.
Wimbledon champion pawh lo ni ve tawh Elena Rybakina pawhin kum 17 mi American wildcard Iva Jovic lakah zahngaihna lantir duh loin 6-0, 6-3 hnehna a chan khum!
American tleirawl kha he draw-a second round lut thei naupangber ni mah se WTA ranking lama a aia pen 184 zeta sang lakah tih theih a nei zui lo!
Rybakina hian first round lamah pawh tleirawl kum 16 mi lek Australian wildcard leh junior world number one ni bawk Emerson Jones a lo hnawtchhuak tawh bawk.
British number one Katie Boulter pawh Russian Veronika Kudermetova lakah 7-6 (7-3) 2-6 6-2-in a tlawm a, major tournament-a thlensan a tumna kawngah second round a pel zo lo leh rih!
22nd seed ni chunga inlan Boulter tan tun kha Grand Slam bika tum 15 lai a inlan tawhna ni mah se third round a la pel zo ngai lo a; kumin hian Briton zinga Australian Open singles last 32 thleng pha palina nih a tum laiin world number nine hluiin round hnihna lekah a dangchat leh ta a ni!
He ti a nih leh tak rih avang hian Emma Raducanu chauh chu British hmeichhiate zinga third round thleng awmchhun a ni.