Ningani zing khan NBA regular season khelh chhunzawm a ni a. Philadelphia 76ers chuan play-off khelh phak tuma an elpui Cleveland Cavaliers an hneh a. 7ers hi an khelh hnuhnung parukah an chak zawn ta chiah. Inkhel dangah Golden State Warriors chu Los Angeles Clippers lakah an tlawm ve thung.
Eastern conference-ah pathumnaa awm mek Philadelphia 76ers hian an hnuai chiaha awm Cleveland Cavaliers lakah bul an tan tha a, quarter hmasa berah point sarihin chungnung zawkah an tang nghal. Quarter hnihnaah point rukin an chungnung zui leh a, point 13-a hmahruai chungin chawlhlawk an hmang.
Point 13 a hmahruai tawh 7ers hian chawlhlawk hnu lamah bul an tan tha lova, third quarter-ah point 13 chiah thawkchhuak theiin, point 18 zetin hnufual zawkah an tang a, an khingpuiten an lehthal. Chak tur zawk chiang lo taka a awm laiin quarter hnuhnung berah 7ers an insiamtha a, point kua zetin chungnung zawkah an tang leh a. An khingpuite lehthal ve lehin point belhkhawmah 118-114 in hnehna pawimawh tak an chang zui ta a ni.
Pathumnaa insawh nghet tura Cavaliers an hneh tum hian Philadelphia 76ers tan Joel Embiid chuan point 38 zet a thawkchhuak a, a che tha hle. 7ers lakah tlawm mah se Cavaliers hian palina an luah chhunzawm zel a, conference play-off khel turin an dinhmun a la tha tawk zui viau tho.
Ningani zinga NBA inkhel dangah champion lai Golden State Warriors chu Western Conference-ah an chung chiaha awm Los Angeles Clippers lakah an tlawm. Warriors tan hian Stephen Curry chuan point 50 zet thawkchhuak bawk mahse a team tlawm tur a chhanhim zo chuang lova, point 134-126 in an khingpui Clippers lakah an tlawm. Champion lai Golden State Warriors hian Western conference-ah parukna luah chhunzawm zel mah se direct a play-off khel phak turin insiamthat a, chak thuai an mamawh viau thung.
Ningani zinga inkhel hmuhnawm takah Eastern Conference-a pahnihna ni mek Boston Celtics chuan an khingpui Minnesota Timberwolves chu point 104-102 in an hneh hram a. Miami Heat chuan an khingpui Memphis Grizzlies chu point 138-119 zetin an sawp a. Los Angeles Lakers chuan an player pawimawh LeBron James leh Anthony Davies te tel lovin Houston Rockets an hmachhawn a. Eastern conference mawngphaha awm mek Rockets lakah point 114-110 in an tlawm ve thung.
76ers an chak tluang
![](https://theaizawlpost.org/wp-content/uploads/tap_logo-min-large.jpg)