All India Presiding Officers’ Conference 85-na, Patna Bihar-a Thawhlehnia neih chhunzawmah Mizoram Legislative Assembly speaker Lalbiakzama chuan India Danpui 8th Schedule-a Mizo tawng a chuan ve pawimawhna sawifiahin, a tel ve theihna atan thawhpui theuh turin speaker leh ram hruaitu kalkhawmte chu a ngen.
Mizoram Assembly speaker chuan India ram chu ‘Mother of Democracy’ tia sawi hial, hnam leh tawng chi hrang hrang infinkhawm ‘Unity in the midst of diversity’ tih theih phah khawpa ram danpui duangchhuaktute fakawm zia sawiin, he danpui tha leh hlu tak hi vawnhim zel a pawimawh tih a sawi.
Sakhaw zalenna chungchangah danpuiin a tarlan ang ngeia khua leh tui zawng zawngin an duh zawng sakhua an zui zel theihna tura constitution vawnhimnaah tan la zel turin a ngen a. Hetihrual hian sakhaw zalenna ram ropui tia sawi thin ram chhung ngeia inrahbehna awm thin erawh pawi a tih thu sawiin, 2024 December 29 khan Howrah, Kolkata West Bengal-a Christian minority-te chunga thil thleng a sawi a ni.
Hemi tuma West Bengal Assembly speaker Biman Banerjee hnena a lehkha ziak bawhzuia rang taka ani’n hma a lo lak avangin lawmthu a sawi a. Inlungrual taka awm tlang dial dial turin kalkhawmte a sawm a ni.
Ram rorelna sang, Parliament leh State Legislatures-a mipui tan a thil tha tak tak an lo ruahman thin sawiin Lalbiakzama chuan, chu’ng zingah chuan a bikin MNREGS leh NFSA chu mi nawlpui leh hnuaihnung tan a tangkai hle tih a sawi. India Danpui vawnhim kawnga Parliament leh State Legislative bodies hma lo lak tawh thinnaah lawmthu a sawi bawk.
Conference ni hnihnaah hian Lok Sabha speaker Om Birla, Rajya Sabha deputy chairman Harivansh Narayan Singh leh India ram pum atanga speaker leh deputy speaker-te an tel a. Thawhtanni atang khan neih a ni.
8th Schedule-a Mizo tawng telh ve turin ngen
