Prime minister Narendra Modi kaihhruaiin 9th NITI Aayog Governing Council chu Inrinni khan New Delhi-ah neih a ni a. Mizoramah Viksit Bharat 2047 tihhlawhtlinna atan chief minister Lalduhoma chuan ‘peace dividend’ ngaihtuah sak turin a ngen.Viksit Bharat tihlawhtling turin remna leh muanna neih a tul hmasa tih chief minister hian a sawi a. Mizoram chu international border pahnih karcheh, a thenawm rama harsatna thleng vanga chim buai reng a ni, tiin, security related expenditure dawn a rem chiah lo a nih pawhin, remna tha a awm avanga hmasawnna lam hawi na kawnga puihna ‘peace dividend’ tal ngaihtuah sak se an duh tih a sawi.
NITI Aayog-in State Institution for Transformation of Mizoram atana tanpuina a pek avangin lawmthu a sawi a. 16th Finance Commission hnena Mizoram mamawh (proposal) an thehluh chu Viksit Bharat 2047 a hlawhtlin theih nana thil pawimawh tak tak an ni tih a sawi.
“Mizoram hian state dangte aiin hmasawnna kan kalpui tlai bik a. Kan awmna a kilkhawr avangin nitin nun man leh hmasawnna hnathawhna man pawh a sang bik. Nimahse, midangte hnunga kal reng ringawt erawh kan tum lo. Sustainable Development Goals tihhlawhtlinna lama kan kal chak dan hian state dangte umpha tura kan tumruh zia a tilang a ni,” Lalduhoma hian a ti.
Tuna mamawh hmasa chu inkalpawhna kawng tha leh tam zawk neih a ni, tiin, Mizoram road density chu national avarage aiin a la hniam bik a. Zirna, hriselna, tui, kawlphetha, faina leh administrative infrastructures indaihlohna pawh a la nasa tih a sawi. State mipui zatve aia tam chu khawpuia cheng an nih avangin khawpui felfai leh leilung chhiatna laka him, state hmasawnna bulthut (growth centre) ni thei neih an mamawh tih a sawi a. Khawpui leh thingtlang mipui lakluh inthlau lutuk tihbo nan leh hna thar tam zawk siamnan Handholding Policy an kalpui dawn a. Hemi atan hian sawrkar laipuiin special package-in pui se an duh hle tih a sawi bawk.
India hmarchhak state-te chu leilung awmdan avangte, infrastructure lama kan la hniam avangtein lndustry lian kan nei tlem a, sum hnar kan tlachham bik tih chief minister hian a sawi. “A bika kan harsatna kan lo hmachhawnna tur, zalen zawka kan hman theih tur fund awm thei se, kan tangkaipui hle ang. 10% GBS (gross budgetary support) hi ministry tin hian inkaihhruaina mumal tak duang se, central PSU ho pawhin an CSR Fund 10% vel tal hmarchhak state-ah hmang thei se,” tiin a rawtna a thlen a ni.
9th NITI Aayog thutkhawmah CM-in ‘peace dividend’ ngen
