RK Dawla
Mb 9366095658
1. April thla laihawl niin huan leh lo lama kan vaimim chinte pawh hnahpui an chhuang tan chauh a, Fall Army Worm khan a bei nghal dêr! Insecticide hlauhawm pui pui hmang lovin sahbawn (eng sahbawn pawh) tuia kahin pangang kha an bo mai e. Tin, vaimim to tantirh atangin Bottle trap siam ila, vaimim chen zelah khai ila, tha takin FAW a veng e… Tam thama ching tân chuan Light trap hmangin FAW hi suat an nuam êm êm e.. Mizo farmer-te hian damdawia kah dam hi kan than-hnan nasa tawh a. A invenna lam hi kan ngaihven lutuk thin lova, hei hi thil pawi takzet a ni. Natna leh rannung eichhetu nghahchhuah kher hi thil âtthlâk a nihna laite pawh a awm mah mah zawk a nia… Tûr tel lova control hlutzia hi kan man a ngai a, loh theih loh a nih ngawt loh chuan, leilung leh mihringte hriselna tichhe thei tûr hi hman loh tur tih hi kan pawm a ngai bawk.
2. Ruahpui sûr hun a thleng chho va. Kan Mizoram awihpang lei chunglâng kalral nasat leh dan tur hi ngaihtuah tham tak a ni. Farmer nawlpui hian leilung kan vei pha lo khawp mai a, kan thlai kan vei pha tâwk chauh mai a ni sia. Farming-a kan buaina tam ber hi a lo thlen chhan leh inven lam ngaihtuah leh chhui zui aiin, kan duh dana damtir kan tum zel mai a… Hei hian thil pakhat chiang takin a entir – kan mindset leh knowledge zîmzia! Khawvela profession upa ber kan la buaipui mêk dan hi thlir chuan, hmasawnna tur a va tam êm! A sawia sawi sên pawh a ni love!
3. Engpawhnise, hma kan sâwn zel ang a. Inelna leh hmasâwn duhna hian rah tha zawk min chhuahsak chho zel ang a. Organic farming kan ngaihhlut hun turte pawh hi a lo thleng thuai ang. Chemical fertilizers leh pesticides vanga harsatna lian tham kan tawh a, kan hmelhriat chian tak tak hnu-ah. Tunah hi chuan, farmer chu sawi loh College leh University degree nei, huan enkawl intite pawh MOP leh Bonemeal hre hrang lo kan la kat nuk a, khua a la var lutuk lo a ni. Sawrkar tha kan nei a, Foreign market kan ban phâk tak tak hunah chuan loh theih lohvin ORGANIC hi kan la bawh dawn tho thove… Hlâwkna hi a sum leh pai ang zâwng chauha teh tân chuan, organic farming hi a hlâwk lutuk lo êm a! Kan ngaihven zawng chu, a tlêm thei ang ber tha thawh a, a tam thei ang ber, rang leh awlsam taka hmuhchhuah leh vat kha a ni mai a. Heng ang rilru pu tân hi chuan, chemical farming hi a hlu riau a!
4. Organic farming hlutna hi kan sawi sêng lovang. Chutih rualin mi zawng zawng tân chuan, organic hi a theih vek loh bawk a. A chhan chu, organic farming hlawhtlinpui tak tak tur chuan, inzir peih, mi bâka taihmâk hlek leh dawhtheih a ngai a. A phûr phûr luhna chi a ni chiah lo deuh a. Tin, subject advance tak leh khirh tak a ni ve hrim hrim bawk. Secondary leh College-a Science student-te hian, Inorganic leh Organic