RK Dawla
Mb 9366095658
1.August thla kan chuangkai a. Ruahtui kan dawng tha chho viau. Heti a nih zel chuan nakum thalah tuihnâ a tlo hlekin a beiseiawm ta. Mizorama kan tuihnâ hi chu vur tuiin a châwm a awm ve lova, fur ruahsur leilunga pût lût, lei chhunga inchhêk khawm rawn irh chhuak lehin a châwm kan ni vek a. Hei vang hian fur chhunga ruahsur dan hi a dawt chiah thal laia tuihna that dan hriltu ber a ni zel a. Tin, mihringten ramngaw leh leilung kan khawih danglam (lo neih leh huan siam, kawng laih, etc) hian leilungin ruahtui a kalkualtir dan leh khawl dan a tidanglam nasa êm êm bawk. Khawvel lo lum zelah hian, tuipui tui chîm chin sâng zel hian direct-in min tibuai ve lo mah sela, sik leh sa inthlak vanga leilunga danglamna thleng tam tak hi kan tuar nasa chho zel dawn niin a lang bawk.
2.Tlangram lo neitu tam takte tan chuan ‘Lo zawh thla’ a ni reng ta mai a. Dan tlangpuiin tlangram lo neitute hian vawi 2-4 an thlo chhuak tlangpui a. Leilet neite erawh chuan vawikhat an thlo chhuak tlangpui thung. Kumin chu a ram pum huap pawhin Lo neih kan uar ber tum a ni hial âwm e, sawhthing kan buaipui nasa a. Chutih rualin experience nei lêm lo, sawhthing hralhna a tha dawn tih vanga ‘ching nghek’ kan awm nualin a hriat a. A chi thlan uluk leh enkawl lamah uluk vak lo, zawt chawp leh risk nial nualin kan buaipui nasa bawk. Thlai engpawh mai hi, beginners tan chuan vawilehkhata thar tawk hi chu a har ve hrim hrim a. Vanneih ngai tak thilte pawh a ni ve âwm e. Social media-ah kan hmu tam a – mithiamte thurawn leh fuihna ai mah chuan, khawi lai kila tuteemaw sawi mai mai leh mahni ngaihdan kalpui tlat ching – thlai damdawi chungchangah kan tam viau. Hmanni lawk khan sawhthing kâp turin Nuvan bur khat leh Profex bur chanve 16L gun-a pawlh zo vekte video hmuh tur a awm a. Kan mawl luatah kan huai mah mah thin a ni. Insecticide hi dan tlangpuiin 2ml/L hi a dose tlangpui a ni a. 16L sprayer-ah chuan 30ml aia tam hman a ngai lo hrim hrim a! Chi 2 pawlh kher phei chu tul lo tak a ni! Damdawi awmzia leh hnathawh pawh hre mumal lo, rannung leh natna kâp dam tura ngaihtuahna mawlmang taka tûr pawlh vak vakte châwm thin Mizote hi ka hrisello khawp mai, a hnam ang pawhin. Chemical fertilizers leh chemical pesticides chungchangah hian Line deptt-te hian Awareness campaign nei uar sela, hriselna lamah hma kan sâwn phah ngei ang.
3.Tunlaiah chuan khawvelin chemical pesticides leh fertilizers-te, a that lohzia tam tak hmuhchhuah a ni tawh a. Loh theih lohna avangin an hmang chauh a ni tawh a. Chutih laia, a nazawng leh thlazena kan expert-te pawhin chemical pesticides an chawh thlazen hi chu fimkhur a tha khawp mai. Damdawi hlauhawm kan chawh rual hian, a safe period leh envinronment-a a hnathawh sawi tel thin a tha khawp mai. Damdawi hi kan ba-sa-ngam mah mah a ni. Thlaia pesticide zungzam test-na laboratory kan nei hnaivai lova, hei vang hian kan la thawveng mai mai hlawm niin a lang. Kan sample pahnih khat hi test ngat ila chuan, a tul bâk bâk thlengin kan insawithaih leh lawi si ang a! Engpawhnise, Selesih lamah khawl bun thuai sela. State dang atanga kan eitur lâkluhte chauh ni lovin tualchhunga kan thar chhuahte pawh engtiang chiaha hlauhawm/himdam nge tih kan la hre thei thuai ang chu.