Imran Khan-a fapate chuan an pa chu Pakistani lung inah a hriselna a tlakhniam zel an hlau va, kum hnih chuang an awm hran hnuah prime minister hlui hi tlawh phalsak turin an ngen.
Khan-a dan hre mi chuan Pakistan-a Supreme Court hnenah kar hmasa khan cricketer hlui hian a mit ding lam khaw hmuh theihna a hloh nasa hle tih a hrilh a. Medical board chuan Thawhtanni khan enkawlnain hna a thawk tha a, a khaw hmuh a ziaawm leh hret tawh tih an sawi.
Khan-a fapate pahnih, kum 26 leh 29 mi, Kasim leh Sulaiman te chuan London-a Reuters hnenah an pa hriselna dinhmun an sawi chu a chiang lo tih an sawi a. Ningani khan an pa hi an bia a, September hnua an inbiak lehna hmasa ber tih an sawi.
An pa hian a hriselna hi engmah a sawi tha duh lo niin an sawi a; mahse, an inbiak danah hian hrehawm a ti a, a mit enkawlna pawh thla eng emaw ti chhung chu a duh lo tih a sawi niin an sawi.
“Kar hlaa a nih avangin ngaihtuah a na zual hle,” tiin Kasim-a chuan a sawi a, a unaupa nen ‘Abba’ tia an koh thu leh damdawi in pangngaiah enkawlin ama doctor-ten enkawl se an duh tih a sawi.
Thuneitute chuan enkawl dan tur pangngaia enkawl a nih thu leh eptuten an ngaihthah nia an sawi chu a dik lo tih an sawi a. Supreme Court pawhin enkawl dan kimchang a dil bawk.
Kum 73 mi ni tawh, Khan-a hi August, 2023 atang khan lung inah dah a ni a, amah leh a kaihhruai Pakistan Tehreek-e-Insaf (PTI) party chuan politic thila an beihna vang niin an sawi.
Kum 2022-a amah rintawk lohna hmanga paih a nih hnuah thubuai tam tak a awrh a, heng zingah hian sorkar hnena thil pek mi dang a pek leh dan lova nupui a neih pawh a tel a. Thiam loh chantirna thenkhat chu tihkhawtlai leh thiam chantir leh sina pawh a awm a, thenkhat chu ngaihtuah nawn leh tura thlen a awm bawk a. Engmah tih dik loh a nei lo niin a insawi bawk.
Kasim-a leh Sulaiman-a hi Khan-a leh an nu, British socialite leh filmmaker Jemima Goldsmith an inthen hnuah Britain-a sei lian an ni a. November, 2022 thah tumna a pumpelh hnuah khan an la hmu leh lo va. Thla hmasa khan visa an dil a, chhanna an la hmu lo.
“Kan tlawh chuan boruak a lian lehzual dawn a, miin an ngaihven lehzual dawn vang a ni thei,” tiin Sulaiman-a chuan chhanna an la dawn loh chhan nia a ngaih a sawi.
Kasim-a chuan tuna an ngaihtuah ber chu a hriselna a ni a, hei bakah hian ‘a zalenna, mihrin inenkawl dan ang taka enkawlna a dawn leh dan anga a chunga rorelnate’ chu an duh niin a sawi.
Chanchinbu leh thil tichhuaktute chu Khan-a hming leh thu sawi emaw, a thlalak emaw tichhuak lo tura tih an ni a. Lung ina khung a nih hnuah court thlalak pakhat chauh la tihchhuah a ni.
PTI hian kum 2018 khan chiang takin inthlanah hnehna an chang a, province tam zawkah thlawp an la hlawh hle.
Ni li chhung PTI thlawhtute chuan Khyber Pakhtunkhwa leh Punjab inkalpawhna an dang a, lirthei tam tak dangin tuialhthei leh ei tur phurh a buai phah nasa hle.
Khan-a thlawptute hnenah Kasim-a chuan ‘rinna neia bei zel turin’ a chah a, “Chu chu kan thuchah ngai reng, la ding reng a ni,” a ti.
A fapaten Imran Khan-a hriselna dinhmun hniam zel hlau
