By RK Dawla
Mb 9366095658
1. June kan lût fel a, YMA DAY rim a nam a, nikir khawchêng kan tih ang thin kha hmun tam takah chuan kan tawng tan. Mahsela, kumdang anga ruahtui dawng tam lo kan nih fur avangin tlangpanga kawrte tui pawh a la bengchheng lo zel a, kumdanga kawngpui kama tui-tâi pût thin pawh hmuh tur a la awm fum fe lo zel a. Hetiang kan nih chhoh chuan, 2024 thâl a na hle dawn niin a lang. Kan Mizoram tuihnâ hi leilunga ruahtui pût lûtin a châwm a nih vek avangin, kumin fur chhunga ruahtui tam dan hian a dawt chiah thâl laia tuihna dinhmun tur a hril zel thin. Kan thlai kumhlunte pawh thâl a nat chuan duat an ngai lehzual dawn a ni. Thlai kumhlunin thâl na lutuk a tawrh hian, natna leh rannung a ngam loh zual phah a. Chumi kuma a rah chhuah mai bâkah kum lokal zel tur thlengin a nghawng pha thin a ni.
2. Fur laia farmer-te problem lian ber ni thin chu HNIM (weeds) hi a ni âwm e. Kawng hrang hrangin hnim suat beihpui kan thlâk thin a. |henkhat phei chuan hlo tûr hmangin hnim kan kâp nasa thin êm êm. A nihna takah chuan hnimte hi leilung tuamdam tura khuanu ruat an ni a. Lei nihphung a inthlâk khan hnim pawh a inthlâk ve mai thin. Tin, hnim hian leilung awmdan min hrilh thin bawk. Bit leh ria taka hnim a to a nih chuan, lei a chhia a; khât leh dâwng tha taka hnim a to a nih chuan, lei a tha tihna a ni tlangpui thin. Tin, soil carbon tlêm apiangah hnim buaipui nasat a ngai thin bawk – thlo fai mah ila, hnim chi ngai bawk a rawn to khat leh tuar thin.
3. BACTERIA FUNGI RATIO (B/F RATIO) : Ramchang kan vât emaw organic matter tawih kan hmang uar a nih loh chuan, kan hmunhma kumhlunte hi leilungah carbon a tlem tawh hle thin a. Hei vang hian leilungah fungi aiin bacteria an tam êm êm thin. Bacteria-te hian nitrates an siam a, chu nitates chu hnim duhzawng tak a ni a. Hnim a tam phah thin. Soil carbon tamah chuan fungi an tam ve thung a, fungi hian nitrates aiah ammonium an siamchhuak ve thung a. He ammonium hi hnimin chuti maia a ei ve theih loh avangin hnim a tlêm phah thin. tawih thei hruihram hmanga thlai bul kan mulch pawh khan, hruihram chuan fungi tam tak a kovin an inthlahpung a, hnim a tlem phah thin. Buhpawl leh thingzai nawi etc hmanga mulch-te kha, kan lo en chîk chuan, an tawih ral tawh hnu-ah pawh kan mulch-na laiah chuan hnim a tlêmin a awmchhun pawh a dâwng tha bik tih kan hria ang.
4. Hlo tûr hi kan hmang lar viau a. A chi thahna (pre-emergence, butachlor, pentachlor etc) te, contact (Paraquat dichloride) te, systemic (glyphosate) te kan hmang nasa hle. Hnim zungah hian thlai tâna hrik tangkai tam takin bu an khuar a, chungho chu hlo tûr hmanga hnim kan kah khan an thi ta puk puk thin a. Hei vang hian soil ecosystem-ah buaina namên lo tak a chhuak a. Chu buaina chuan zawi zawiin kan leilung leh thlai chinah nghawng tha lo zet a rawn irhchhuahpui thin. Hlo tûr hmanga hnim sawisak hi bawngtuthlawh hmanga hnim rihfai kawlh vek ai pawhin a la pawi thui zawk a ni. Hnim kan ngaimawh a nih chuan, kan hnim leh leilung kan zir chian bâkah hnim aiawha leilung tuamdamtu tur engemaw kan dah a ngai. Tu leh fate thlenga leilung tha, thlai hrisel leh tlo hnutchhiah kan duh a nih chuan, hlo tûr hman hi a kawng-lo chiangkuang khawp mai.
A GUIDE TO SMART FARMING – 23
