J.H. Biakmawia
Teaching Line-ah kum 10 emaw lek pawh la thawk lo mi engemaw zatin ngam tlak vang leh School Education Department nuthuri zuam vang emaw leh thil dang vang tein Education Department kum 40 zet chu sawisela chirhtheh zawngin thu an ziak thin. Duhsakna, siamthatna, fuihna lam aiin kamchhe tleuh nan an hmang ta mai emaw tih khawpin an thu leh hla pawh a hriam thei hle. Minister incharge, Directorate Staff, Districts, Sub-Divisions Staff te bakah Institutions hrang hranga thawk te hian – Hmasawn leh fak tlaka thawh chu tha an tiin an tum ber a nih avangin – An thlavang hauh zawng leh fuih tang zawngin thu fahrah te te ka ziak ve fo thin a, a chang phei chuan anmahni demna lam pawh ka zep tel zeuh thin. Zirtirtute lah hian Aizawl/khawpuia awm hi an tum vek mai si a… tih phei hi chu a DIK Lo. School-ah leh Office-a ka thawh ve lai khan – Thingtlanga Zirtirtu hna thawk zingah Aizawl/Khawpui-a transfer duh hlek lo an tamin ka hre teuh mai, transfer dil leh beisei te aiin an tam zawk daih.
Thupui kan tarlan ang hian Institution-a thawk ten huatah lo la lo sela, duhthawhna avangin dengkhawng deuhva ngaih theih te pawhin PEHHEL vak lovin han sawi ila – A hua hua chuan mahni inenfiaha insiam that nan hman ka duh e.
PRIMARY LEH MIDDLE SCHOOL : Teachers indaih loh sawi luai luai laiin Headmaster(Promotees) tam tak chu Subject pawimawh bitum ahnekin Head nihna changchawiin Classes an la peih lo nia ! A zia lova, a zahthlak mang e. Teachers te lahin periods neih tam an hlau ngawih ngawih a, pelhe an ching hle.
Elementary Stage-ah hian B.Ed ka training kum tiam lovin kum 10(ten) ka thawk a, ka thiam bik lem loh English ka bitum tluan thak. Indaih loh changin Classes hnih kawp chang ka nei thin a, kum khat phei chu ka thiante an thlawn vek avangin September – November chhungin Class IV – VI keimahin ka thawk tluan ve. Middle School (MESLC) Board Exam lai hun khan kan Naupang te an Fail ve ngai lo. Mizoram Topper, Toptens, Toptwenties kan nei thei. (Ka chanchin hian zelthel te fuih rawh se). Kan results tha ziah kha ringhlelin MESTA hruaitu ten DIS-ah min hek vel maw le! Sub-Inspector of Schools (SIS) Pu K.Biakluanga(RIP) kha kan Centre-ah Officer-incharge(Superintendent kan tih tak hi) hna thawkin rawn dah a ni (kei chu Gauhati ah MA classes chhimin ka zin bo daih – 1976). Hemi kum hian Candidates 18 ten I Division-ah, a dang 5 ten II Division-ah 100% Pass. Ka hmuna O/C thawk khan Zion Street Tea Stall-ah thingpui leh chhang min khilaiin, “A hek vei che a, in School results a tha hle si a, an hek ropui che…” min ti. Ka thiante nena kum tluana kan thawhrimna kha Lalpan mal min sawm a ni. Primary School ten indaih loh vanga Zirna (Academic Standard) hniam ta leh Students hmu zo lova an insawi hi THIL AWIH AWM LOH TAWP a ni Pawl ‘A’, ‘B’ Pawl leh Class I – III kha Putar Class VI pass in Single Teacher-in min ho va, PSLC(Board) Exam chu I Div-ah kan pass thei tho. Primary School-ah chuan classes Hnih/Thum kawpin a harsa lo ve, thawhrim leh taimak a ni ber. Mahni naupangte Hmangaih leh Duhsak hi tun lai Teachers te hian an nei peih ngang lo a ni zawk. School tha din sela students chu an hip teuh mai ang chu – Free Textbooks, Free Uniform, Mid-day meal te hi Nu leh Pa ten thlahlel mah se, zirna chhia chu harsa tak chungin an tlansan thin. Medium of Instruction vang ngawt a ni lo ve… Teachers ten Naupang an hip zo lo a ni zawk. “As the teachers, so is the school” tih hi kan pian hma atanga vawiin thlenga thudik a ni si a.
HIGH SCHOOL VE THUNG LE: CCE (Elementary stage-ah) kan kalpui ta, hlawhtling taka kalpui theih nan Monitoring Cell rintlak din a tul e… tiin vawi duai lo auchhuahpui mah ila, tun thlengin kan la nei lo (kalphung thar sorkarah hian beisei ila). CCE hmanga engmah thiam nei lova an rawn thawn chhoh vangin Class IX & X-ah enkawl that theih a ni lo ve… tih chu H/S Teachers tam berten chhuanlam atana an hman a ni. Class VIII pass te chuan ‘Shape’ mumal an nei emaw nei lo emaw, an thiam lohte lo thiam tira an nih loh nihtir chu an duty liau liau a ni.
Headmaster-ah promoted an han ni ve hlawl mai a, eng Subject Teacher mah ni lova Office a thut mai mai kha an nihnain a ken tel niin zu ngai tlat hlawm a! Teaching hrim hrim hi nuam tihna leh hlimpuina an lo nei ngai lo a ni ngei ang. High School Stage hi Class VII – X kan neih lai atanga vawiin thlengin Medium of Instruction chu English a ni (Mizo Subject tel lovin) Teachers zahve 50% pawh hian English-in Class teaching an la THEI LO/ ngam lo zu nia! An students ten English-ah hmasawn ngaihna a awm lo. Headmaster ka nih laiin Non-Mizo 4/5 ten an hmang thin tih loh chu English hmang ka hmu tlem hle. Headmaster ho lahin Subject chanpual an nei peih si lo. Thiam lo chungin mahni inzir reng chungin kum 25 chhung H/S Headmaster hna ka thawh ve khan ENGLISH Subject ka bultum tluan zak a, peih sela chuan tuna kan Headmaster te hi kei aia thiam zawk an tam ang mahse peih hek lo le.
Headmaster tan Office works buaipui tak tak tham a awm lo va, kar khata periods 10-12 lak ve chu an hman em em. Indaih deuh chuan period 8(eight) lek lain Supervision uar sela. Headmaster ni ve vung siin Supervision nei ngam lo te, Teachers Log Books checking/ inspections nei ngam lote an tam mai (hei hi zawng anmahni thawhrimna leh inpekna ten a phu ngang lo a ni mai).
Teacher pakhatin kar khat(One week) chhunga periods 10(ten) aia tlem nei an tam viau te hian INDAIH an nihzia a sawi fiah hle, Period 16-20 neih hi hahthlak a ni lo ve. Class la tura muang hle si a period tawp hmaa chhuak leh daih te hi chu Corrupted Teachers an ni. Mahni period theihnghilh thei te pawh zu awm a! Routine en miah lo pawh week Days tea kan periods neih hun chu hre ngei tur kan ni. First period nei hreh tlat ten Last period neihtir an hlau lehnghal !
HIGHER SECONDARY STAGE:
Education Commission “1964-66” (Kothari Commission ti-a kan hriat lar) khan Pre-Degree course kum hnih PUC tih thin kha H/SS-ah Class XI & XII – a transfer tura a recommended daih tawh chu keini state chuan kum 30 naah kum 1996 khan kan tan ve tawk a. Master Degree holders ten an daih tha lo va, a dil apiangte appoint zel an ni mai.
Chutiang pawh ni sela Master Degree nei te chu – Mi puitling leh thiam turah ngaih an ni. Mizo Subject lovah chuan Medium of Instruction-ah English ngei ngei tur a ni, heti chungin 60% lai chuan English-in teaching an pe THEI LO/ngam lo tlat asin! Engati nge? Engvang nge? Tihluih tir a tha ang em? Tih luih tir ila an mualpho mai ang em? Principal hna ka chelh laiin 70% tal chu hmang ila… tiin meeting-ah appeal ka siam a, ka colleagues ten min hnial lem lo ve, Mahse Supervisions ka neih thin khan an room bula ka kal laiin English han hmang thin mah se ka kal sawn hnuin Translation Method an kalpui tih ka hria. An thiam lo ni lovin zirlaite an hrilhfiah tawk lovah an inngai em ni aw… ka ti thin.
PGT an nih lai leh Lecturers ti-a an hming thlak a nih hnu thlengin School tan hnua mahni period nang tawk leka school thlen ching leh Classes neih tawh loh vanga Working hours tawp hmaa eng emaw Excuses siama haw hma dil ni tin kan tawng thin (A then phei chu a ruka lo haw daih pawh an awm).
College Lecturers (tunah Professors) tih dan an thik ni-a rinna kan neiin School kan nih an haider emaw tih mai tur a ni, Professors te pawhin UGC Norm angin College a thut chilh lo nasa e.
Stages hrang hrangah fel hlel awm te kan tarlang ta nual a, heng Stage hrangah te hian Higher Secondary Stage hi an ziaawm deuh ber em aw? Tih theih a niin anni pawh hian hmasawnna tur tam tak an la nei. Principal zingah Lecturers ten Log Book maintain tura la Introduce ngam lo emaw Quarterly Inspection pawh nei thei lo/ngam lo an awm a ni awm e, Classes Teaching laia Internal Supervisions nei hlei thei lo Principals pawh kan nei nual hi a tha lo. Friendly, Motivating & Encouraging taka Supervision neih hi Lectures tan leh students tan a tha hle a ni.
Thupui ngaihno bei lem lo neiin a Contents pawhin – My fellow Teachers lawmzawng a keng lo a ni thei e. Service hun tawp ka hmanna Office lam hawiin remchangah thupui pangngai lam hawia ziak ka tum. Institutions/Schools-ah Rural & Urban-ah hun tam ber hmangin Office dawr thintu zinga ka awm hun lai leh Office-ah thu vea Schools atanga min rawn dawr thin te-a ka tawnhriat leh ka hmuh ten min hmuak zut zut mai.