Kum tawp lam hi Mizoram leh state dang palite inthlan hun tur a ni a, India rama sorkarna changtu NDA-in ‘One Nation, One Election’ tih thu an tuipui avangin state pangate inthlan hun tur hi sawn hlat a ni mai ang em tih zawhna a awm. Mahse an sawn hla dawn lo a ni ang tih ngaihdan a awm leh tawh.
NDA hotu BJP-in India ram state tinte hi a rualin inthlang se an duh a, ‘One Nation, One Election’ tih thu an tuipui mek. Chuti a nih chuan kum tawpa inthlang turte pawh hi nakkuma Lok Sabha MP thlan ruala inthlang turin an ti ang tih rin dan a awm. Hemi chungchang hi India ram politics titi pakhat a ni.
Thawhtanni khan parliament session an tan a, heta ngaihtuah turah hian ‘One Nation, One Election’ hi a tel rinna a lian hle. Thu khel tur lian tham a awm lo chunga session an ko hian chumi rinna chu a tilian zual a, mahse an ngaihtuah turah ‘One Nation, One Election’ a tel lo.
Chawlhni tlaiah khan party tin hruaitute kalkhawmin session neih tur hi an thlirho a, chutah chuan ‘One Nation, One Election’ hi a lang lo. Mizoram MP pahnih, C Lalrosanga (Lok Sabha) leh K Vanlalvena (Rajya Sabha) te an tel.
K Vanlalvena chuan ‘One Nation, One Election’ a tel loh thu hi a sawi a, party hruaitu thenkhatin hemi chungchang hi an sawi chhuah thu, a ruka rawn rawlh luh tumna a awm em tih te pawh an zawh thu a sawi.
“Thil pali chhawp chhuah a awm a, One Nationa, One Election a tel lo a. Uniform Civil Code pawh a tel lo,” K Vena chuan a ti a, “A rawn thun lut zeuh dawn em tih te chu hriat a ni lo a, mahse tunah chuan a lang lo chu a ni a,” a ti.
Tun tum session hi parliament building thar tihlar tumna ni bera a hriat thu a sawi a, India ramin parliament building thar a nei a, chu chu mipui hriata chawi lar tumna a ni ang tih a rin thu a sawi.
Thawhlehni hian MP te’n thla an la ang a, chumi zawhah building tharah hian an lut ang.
Kumin hi Mizoram bakah Rajasthan, Chhattisgarh, Madhya Pradesh leh Telangana te inthlan kum a ni a, Mizorama MLA ding laite hi December ni 17 thlenga mi tur an ni. Kumina inthlang turte hi BJP chak lohna an nih hlawm avangin BJP hian ‘One Nation, One Election’ tia inthlan an sawn mai rinna hi a lian a ni.
A hun pangngaiah Mizoram inthlang dawn?
