Barcelona thuneitute beisei a phak loh avanga season tawp hmaa a ban tur thu an puan hnan hnuah Pathianni zan khan Xavi Hernandez chuan Barca boss ni chunga a game kilkawi tawpbernaah 2-1-in a team chu Sevilla mualah a chakpui a; Catalan team hian La Liga table-a pahnihna ni chungin season an khar a, champion Real Madrid lakah point 10-in an hniam.
Karliamta Zirtawpni mai khan Catalan team hotute chuan an midfielder hlui Xavi an ban thu hi an hriattir a, boruak rit tak hnuaiah Pathianni khan season kharna leh Barcelona boss ni chunga a game hnuhnungber ni nghalah Xavi chuan a team a chakpui a; inkhelh banah a hnathawhte chu an hriatpuiin, an pawmpui tawk lo tih a sawichhuak.
Xavi chuan, “Kan hnathawhte hi min hlutsak tawk lo deuh niin ka hria. Nikumah La Liga leh Super Cup lain double champion kan ni a, kuminah beisei kan pha ta lo.
“Ngaihtuahna a phir lo thei lo a, a chhan pawh title hlawhchhuak lo mah ila kan hnathawhin a tha zawngin rah a chhuah tho a, kawng dik kan zawh chho leh tan mek niin ka hria,” a ti.
Ramon Sanchez Pizjuan stadium-a Pathianni inkhelah Robert Lewandowski chuan minute 15 an khelh tlin rualin mikhual hmahruaina a thun zet a, darkar chanve khelh pelh hlawtah Youssef En-Nesyri chuan Sevilla siphurh sutna goal khungin, second half tir lama Fermin Lopez goal chu Nou Camp club hian an chakpui hram a ni.
He game khelh hma hian Barcelona chu La Liga lamah pahnihna an ni chiangsa tawh a, Sevilla erawh chuan 14-na daih ni chungin season an khar thung.
Spain midfielder hlui Xavi chungchangah kirleh ila.
Kumin January thla daih tawh khan Barca boss nihna an hlihsak tak hian Nou Camp a chhuahsan mai theih thu a lo sawichhuak tawh a, mahse, kumin April thla khan club president Joan Laporta sawmna avangin a ban tum a thulh a, mahse, a cham zui tur thu a sawi atanga thla khat lek hnuah Laporta leh sporting director Deco-te nen dawhkan an kilho a, a hnu lawkah kum 44 mi chu ban a nih thu club thuchhuahin a puang zui leh ta mai a ni!
Bayern Munich boss hlui Hansi Flick chu Catalan club enkawl tura rinkai ber a ni mek.
Player a nih laia Barca tana Champions League title pali hlawhchhuak hman Xavi hian a club hluia head coach hna a thawh chhungin nikum mai khan tunhnai season nga chhunga Barcelona kuta La Liga title lut awmchhun a hlawhchhuahpui a, tarlan tawh angin, Super Cup-ah a champion-pui bawk a, tuna an ban leh tak maiah hian a vui ve deuh tih a tawngkam atangin a lang thei a, a hnathawhte chu an hriatsak tha duh lo niin a sawi hial a ni!
Barca goalkeeper Marc-Andre ter Stegen pawhin an boss kalchhuak ta chu fakin, “Xavi hian thil tam tak min pe,” a ti.
A hun tawpa Barca chakpuitu Xavi
