A lal leh hnua a vawi khat nan Modi-a’n Trump-a bia
Prime Minister Narendra Modi chuan Thawhtanni khan US President Donald Trump chu phone-in a bia a, Republican hruaitu hi January 20-a lak luh a nih hnua a biak hmasak ber a ni.
Modi-a hian a term hnih nana US president 47-na a ni thei chu a lawmpui thu a hrilh.
Hruaitu pahnihte hian a hma ang bawka hlawk taka inlungruala thawhho zel an duh thu an sawi ve ve a. Technology, sumdawnna, investment, energy leh venhimna lama tanho dan tur hrang hrangte an sawi dun a ni.
Prime Minister Modi leh Trump hian an ram hnih inkar bakah khawvel thil hrang hrang an sawi dun a, heng zingah hian Asia khawthlang lam leh Ukraine chungchang pawh a tel a. Khawvelah muanna, himna leh thanna a awm theih nana thawh dun zel ni se an ti.
Hruaitu pahnihte hian inpawh taka awm zel an duh thu leh hun remchang an neih dun hun hmasa berah inhmuh an duh thu an sawi bawk.
An inbiak zawhah Modi-a hian, , “Ka thian duh tak President Donald Trump nen tha takin kan inkawm a. A vawi hnih nana a president leh thei hi ka lawmpui a, inringtawna hlawk taka thawhho zel tha kan ti a. Kan mite ve ve tan leh khawvelah muanna, himna leh thanna a awm theih nana thawh tlan kan duh,” tiin X-ah a tar lang.
Trump-a lak luhnaah khan India atangin External Affairs Minister S Jaishankar chu a tel a. National Security Advisor Mike Waltz a kawm bakah QUAD meeting-ah secretary of state thar Marco Rubio, Australian Foreign Minister Penny Wong leh Japanese Foreign Minister Iwaya Takeshi te nen an telho nghal bawk.
Jaishankar-a hian Rubio hi a kawm bawk.
Trump-a sorkar ding thar leh hian a hun hmasa ang bawka inkungkaihna tha neih a duh nia ngaih a ni a. Technology, venhimna leh himna, sumdawnna leh eibarah thawh tlan zel a duh.
Jaishankar leh Rubio inkawm pawh hi hlawk taka inkawmna nia sawi a ni a, ram pahnihte hian ngaihven thuhmun leh himna thuhmuna kal zel an duh a ni.
A lal leh hnua a vawi khat nan Modi-a’n Trump-a bia
