A mawngphah team lakah Barca chak chang chang
Karlaihawl Nilaini zan Spanish La Liga inkhel pakhat-ah Barcelona chuan 3-2-a table mawngphah luahtu Almeria hnehin khelh 18-a point 38 nen pathumna an luah chho a, palina lama an nekthlak tak Atletico Madrid lakah game khatin an khel tam a, an inthlauhna hi point thum a ni.
He inkhelah hian Raphinha chuan darkar chanve pelh hlekah home team hmahruaina goal khungin, chawlhlawk dawnah Leo Baptistao chuan Almeria siphurh a sut a, goal dang luhbelh loin half time chawlh an hmang.
`Second half tir lamah captain Sergi Roberto chuan Catalan team hmahruai nawnna goal khung leh mah se Edgar Gonzalez chan a mawngphah chhuahsan tuma tan khawh Almeria siphurh a sut leh nawlh a; minute sarih chiah awm tawhah Roberto bawkin Barca hmahruai nawnna leh an chakna goal ni zui ta a tilut leh thei hram a, a Barcelona career-a game 357 a khelh tlinah tun kha match khata goal hnih a thun tlin vawikhatna chiah a ni.
Tarlan tak angin, he result hlu tak avang hian Catalan team chuan La Liga title race-ah beiseina an la nei zui hram hram thei a; mawngphah club laka an point thum hlawh-chhuah hmanga pathumna luah chhoin, hmahruaina Girona lakah point rukin an hniam a, an chung chiaha pahnihna luahtu Real Madrid chu point liin an pha lo thung.
An chunga awm team pahnihte hi an aia game khata khel tlem ve ve an nih avangin Barcelona laka an san zawkna hi la sang leh thei a ni. Nizan result tarlan hman loh pahnihah Girona hian Real Betis an luhchilh a, Real Madrid-in Alaves an hma-chhawn ve bawk.
Xavi Hernandez-a team hi an game hnuhnung pathuma vawikhat mah chak zo lo an nih avangin Nilaini zana an result hlawhchhuah hi inrintawkna an neihkir lehna atan pawh a pawimawh hle tura ngaih niin, Christmas break an hman hmain Dallas khawpuiah Mexican side Club America nen friendly match an khel leh ang a, kumthar January ni 4 khian La Liga lamah kirlehin Las Palmas an luhkhung ang.
Tarlan tak angin, Spanish champion Barcelona hi inelna hrang hranga an game khelh hnuhnung pathumah an chak zo lo a, Valencia khelmualah 1-1 draw an hlawhchhuak thei hram a, hmahruaitu Girona an mikhual tumin an kawtkaiah 4-2-in an tlawm bawk kha a ni a, Nilaini zanah pawh mawngphah team lakah goal hnih an chhuah a, harsa takin point thum an hlawhchhuak thei hram a ni.
Inkhelh banah Barca coach Xavi Hernandez chuan hlauthawng reng renga mi-nute 90 chhung hun an hmang leh kha a beisei aia nasa tawrhna niin a sawi a, an phu tawk aia harsatna lian tawk an nih thu a sawi.
Xavi chuan, “Shot vawi 30 tehreng nei tling chungin goal hnih kan chhuah a; ka tan chuan coach ka nihna zawnah first half kha pawm theih a ni lo. Second half erawh a zia ta deuh. Kan hlawhchham nasa a, khati taka goal khung harsat chung khan thlakhat leh a chanve emaw hla hnih dawn lai kan kal tling ta.
“He team hian kan thlarau chan kan hloh chhia va a ni, season liamtaa kan thlarau chan ang kha.
“Kan hriam lo a, concen-tration kan hloh zel bawk a; second half kha chu Barca khawsak dan atana ka duhdan a ni,” ,” tiin an harsatna tawh mek chungchang a sawichhuak a, inkhel a thlirlet nghal.
Barcelona khan a khelhah first half thunun hneh hle mah se chance 15 zet an hmuhah tum nga chiah goal zawnah ball an thawnlut zo a, halftime-ah an inhnehtawk zui ta nghe nghe a nih kha.
Almeria kha tun season league-a chak ni hmel la hmu miah lo an ni a, Spanish La Liga table mawngphahah an tang nghet zual zel!
Nilaini zan Spanish top flight inkhel dangah Athletic Bilbao chuan sikhat faiin an mikhual Las Palmas an hneh a;
Villarreal khelmualah 3-2-in Celta Vigo an tlawm ve bawk.
A mawngphah team lakah Barca chak chang chang
