Singer D4vd, kum 21, a hming tak David Anthony Burke chu Los Angeles police ten Hollywood Hills-a a chennaah an rama Ningani kalta tlai dar 5 khan an man a, Los Angeles County District Attorney Nathan Hochman chuan D4vd an manna chhan hi tleirawl kum 14 mi, Celeste Rivas Hernandez râwng taka thahna nena inkaihnawih niin a tarlang.
Hernandez ruang chhe tawh tak chu September 2025 khan Tesla car hmalam bungraw phurhnaah hmuhchhuah a ni a, he Tesla car hi David Burke hminga register a ni. Thuneituten thla ruk vel ngawrh taka an chhui zui hnuah D4vd hi an man ta a ni.
Hochman chuan, “Celeste hi David Burke hian zahmawh takin a khawsakpui thin tih hriat a ni a, chutih lai chuan hmeichhe naupang, kum 14 mi chauh a la ni a. Chutah chuan Burke chetna hi a la tawp mai lo. Celeste hian a chunga a thil tih tha lo tak chu puan chhuah a, tihmualpho a, a musical career tihchhiat sakah a lo vau a. Burke hian a that ta mai niin a lang. A taksa a chan darh a, bag pahnihah khungin, a car hmalam thil phurhnaah a dah ta a ni,” a ti.
D4vd hi thubuai chi hrang hrang siam sak a ni a, chung zingah chuan tual that, naupang kumtling lo zahmawh taka khawsak pui, dan phal loha mihring taksa chan darh te pawh a tel a, Thawhtanni kalta khan arraignment hearing neih niin, D4vd chuan thiam lohna a nei lo niin tan a khawh ve thung a, Nangni-ah court-a inlan leh tura tih a ni.
Hochman leh LAPD Chief Jim McDonnell te chuan D4vd hian a ina leng tura a sawm angin Rivas Hernandez hi April ni 23, 2025 khan D4vd inah hian a leng a, chumi hnuah chuan he tleirawl hi tuman nung damin an hmu leh ta lo niin an tarlang. Rivas hian an inkar chu puanchhuahah a vau a, hei vang hian D4vd hian a that ta mai nia an ngaih thu an tarlang bawk.
D4vd ukil-te chuan thuchhuah siamin, an client David Burke chu he thil thlengah hian a inhnamnawih lo a, Celeste Rivas Hernandez thihnaah hian mawhphurhna engmah a nei lo a, he case-a evidence tak tak chuan David Burke hian Celeste Rivas Hernandez chu a thah a nih loh thu a pawrh lang ngei dawn a, an client dikna tilang turin theitawpa tan an khawh tur thu an puang ve bawk a ni.
David Burke hi bail theih loha man a ni a, he case-ah hian thiam loh chantira convict a nih chuan dam chhung jail tang tur emaw thi tur emaw a a chungthu rel theih a ni ang.
A music career tawp tur vanga tleirawl kum mi 14 thatah D4vd puh a ni
