A nghawnga chemte bur vû chungin amahin damdawi in-ah inkhalh thleng

A nghawnga chemte bur vû chungin amahin damdawi in-ah inkhalh thleng
Tejas Patil, kum 30, Sanpada-a sumdawng chu June ni 3 khan a muthilh laiin a nghawngah chemtein an vit a, a nghawnga chemte bur vu chungin km 1 vela hla damdawi inah a inkhalh thleng a, mak takin a dam chhuak tlat.
Tejas Patil hi MPCT Hospital-ah darkar li chuang an zai a, a nghawng atanga chemte lak chhuah leh a thisenzam a tihchhiat te an siamtha a, Thawhtanni kalta khan ICU atangin room pangngaiah an sawn chhuak leh tawh a ni.
Tejas Patil hian a nau, Monish, kum 28, chuan Inrinni zanah a vit niin a sawi a, chhungkaw thila inhnial buai avanga thinrim ni a a hriat thu sawiin, “Monish-a’n min thah a tum mai hi mak ka ti tawp thei lo,” a ti niin Times of India chuan a tarlang.
Patil chuan Monish hian zu a in nasa niin a sawi a, amah an vih lai hian a Monish-a thianpa Turbhe Mahesh pawh a tel ve niin a sawi.
MPCT Hospital-a doctor te chuan Patil-a’n rikrum thilah rilru fim a pu thei chu a dam chhuahpui niin an sawi a, Patil hian a nghawnga chemte bur chu ama tawka phawi tum mai lovin damdawi in hi a pan a, ama tawka phawi tumin lo bei se chuan a thisenzam pawimawh te chatin, a thih phah zawk hlauh thei niin an sawi.
MPCT Hospital a thawk Dr Prince Surana chuan, “Patil hi a rawn luh veleh CT scan kan ti nghal a, a nghawng, a thluak leh a awmbawr te kan en nghal a, chemte chu engtiang a thukah nge a luh tih leh engtiang chiahin nge thil a khawih pawi tih te kan en nghal a ni,” a ti.
Plastic surgeon, neurosurgeon, interventional radiologist leh heart surgeon te an inpun khawm zung zung a, chutiang doctor rual thawk ho chuan a thisenzam pawimawh leh nerve te tichhe lova chemte phawi dan an ngaihtuah ta a ni.
Patil hi an zai zawh velah ventilator nen enkawl zui nghal a ni a, mahse, ICU-a nikhat a awm hnuah ward pangngaiah an sawn chhuak leh ta a, police te pawhin a statement lain, amah khawihtu ni a sawite lakah hian IPC section 307 (tualthah tum) thubuai ziak lutin man tumin an zawng nghal a ni.