Lengpui Airport thawmthat hna thawh chu ruahman angin hna thawh a ni loa, a nih dan taka siam turin a hriattir tih chief minister Lalduhoma chuan a sawi.
Inrinnia Kolkata atanga a rawn haw hnu in Lengpui Airport thawmthat dan hi a endik nghal tih a sawi a. Sum tam tak senga an ramp pahnih siam chu a bang awm tur a nih laiin bang nei loa siam a ni a. Airport atanga thlawhnaa luh nghal theihna tur ‘aerobridge’ siam tur a nih laiin siam a ni lo a; baggage area hmun hniha dah tur a nih laiin hmun khatah chauh dah a ni tih a sawi.
Departure area-a dropping zone pahnihin hulhliap an neih loh thu sawiin, ruahsur nikhuaah passenger-te an huh vek thei dawn tih a sawi a. Airport sak dan tura ruahman a nih dan ang taka sa zo thuai turin contractor-te a hriattir tih a sawi a ni.
New Delhi-a Civil Aviation ministry hotute nen an inkawmnaah Mizoramah Indigo thlawhna chauh service a awm avangin an duh duhin thlawhna chuan man an ti to a, chuan man a hniam deuh theih nan leh an elpui turin Civil Aviation ministry chu Mizoramah Air India service awm theihna atan hma la tura a ngen thu chief minister hian a sawi.
Mizoramah helicopter lian leh tam zawk service a nih theih dan tur ngaihtuah a ni tih a sawi a. District 11-ah heliport din a, hmun 15-ah helipad siam belh nise an tih thu a sawi.
Chief minister chuan Lengpui Airport enkawl a hautak hle tih sawiin, “Keini aia state lian leh hausa zawkte pawhin state enkawla airport neih duh an awm tawh lo a. Airport Authority of India kutah emaw Adani Group kutah emaw hlan dan ngaihtuah nise kan ti a; Civil Aviation ministry-in a lo buaipui dawn a ni,” a ti. An zirchian hnuah tha zawk tura an ngaih hnenah hlan chhawn a nih tur thu sawiin, Lengpui Airport chu international airport ni thei tura hmun tha leh rem a nih thu a sawi bawk.
A nih dan tur angin airport cheitha lo
