Hollywood star Kevin Costner chu a nupui hlui Christine Baumgartner hnenah thla tin an fate enkawl nan dollar 1,29,755 pe thin turin court-in a hriattir niin TMZ chuan an tarlang. TMZ chuan he thu hi court document an neih atanga an hriat a nih thu an tarlang tel bawk.
Kevin Costner leh Christine te hi kum 18 an inneih hnuah thla hmasa lawk khan an inthen a, Christine hian Kevin nena an fate pathum- Cayden, kum 16, Hayes, kum 14, leh Grace, kum 13, te enkawl tur court-ah a phut a, court hian an nupa inthenna chungchanga thutlukna mumal a neih hma chu Christine hnenah thla tin dollar 1,29,755 hi an fate enkawl nan pe thin turin Costner hi a hriattir ta a ni.
Christine hian dollar 2,48,000 a phut zawk a, hei hi an fate lehkha zirna senso leh an hriselna chungchanga inenkawlna leh thildang atana a phut a ni a, Christine hian an fa hmasa ber Cayden 2007-a a pian atangin hna a thawk tawh lo va, sum thawhchhuah nei tawh lovin chhungpuinu nih chu hna berah a nei ta niin court-ah hian a hriattir bawk a ni.
Kevin Costner chuan May ni 1-a court-a inthen dilna an theh luh hnuah nupui hlui hi Santa Barbara-a an chhungkaw in atangin a chhuak duh lo niin a sawi a, Christine nen hian an inneih hmain ‘an inthen leh palh a nih pawha lo inremsiam lawkna’ (prenuptial agreement) an nei niin a sawi a, chutah chuan an inneih hmaa an mimal thil neihsa te chu an inthen a nih pawhin inchuh buai theih loh tih an tarlang ni a sawiin, Santa Barbara-a an in chu an inneih hmaa a neih tawh sa niin a sawi bawk.
Hei bakah hian Costner-a legal team-te chuan Christine hnenah hian tum hnih dollar 1,00,000 ve ve an pek tawh bakah, an inthen hnuah dollar maktaduai khat an pe tawh bawk niin an tarlang a, mahse, Christine chuan heng pawisa pek an tum hi a dawng duh lo niin a sawi ve thung.
A nupui hlui hnenah thla tin $129K pe turin court-in Kevin Costner a hriattir
