A pa beidawn hnua champion Kimi!

A pa beidawn hnua champion Kimi!
Kum 20 leh ni 68-a leka upa ni chunga Formula One world champion ni thei naupang ber nihna record siamtu Mercedes driver Kimi Antonelli chuan Pathianni Mexico City Grand Prix kaltlanga a F1 title hmasa ber a sualchhuah hma lawk khan a pain sum sen tur hautak lutuk vanga Formula 1 race luhchilh lo tura a duh thu a sawichhuak!
“Ka pain race hawisan turin min duh a, a chhan pawh amah ngeiin he sport hi a lo beidawnpui tawh a, thil nihna dik tak a lo hmachhawn tawh vang a ni.
“Sum lama puihna a hmu lo a, a racing career chhunzawm ngaihna a awm lo a, amah anga lunghnur taka ka awm ve a duh loh avangin F1 race hi luhchilh lo law law turin min duh a ni,” a ti.
Kan hriat angin, Formula One racing-a intatlut turin sum tam tak sen a ngai a, mihausa tawntaw fate nih loh chuan sum lama puihna tha tak dawn fuh ngai thil a ni a, mi naran tana he racing hi zuan ve ngawt chi a nih loh avangin Kimi pa Marco Antonelli pawhin a fapa a lo beidawnpui tawh a, mahse, amah ang lo takin a fapa chuan Formula One a luhchilh thei a, world champion ni thei naupang ber a ni zui ta hial a ni.
Kum 73 liamtaa champion Alberto Ascari hnu lama Italian F1 champion ni leh thei hmasaber Kimi Antonelli hian Pathianni Mexico City Grand Prix-ah khan lawmman semna dawhsan hniamber luahin pathumna daih ni mah se pathumna ken tel point a hmuh belh hmangin driver standing lama amah hnaihbertu Red Bull chhuanvawr Max Verstappen tana lehpelh phak tawh loh turin an inkar chu 119-ah a dah thei ta a, Sebastian Vettel-a record khumin Formula One youngest world champion a ni chho ta luah a ni.
German Vettel khan kum 2010-ah kum 23 leh ni 134-a upa ni chungin champion naupang ber nihna record a siam a, kha title kha Red Bull vuan chunga title pali a sualchhuah zinga a hmasaber a ni nghe nghe.
Red flag vai phet lawp lawpna Mexico City Grand Prix-ah season tawp lama arh pahnih Max Verstappen leh Lewis Hamilton chuan Italian driver Antonelli an thlen khalh a; Red Bull Dutch driver hi pakhatnaah thlengin, Ferrari Briton driver hi pahnihna a ni.
Kan thlirliam tak ang khan Mexico tlankawngah thil thleng a tam hle a, safety car vawi hnih rawih niin, chetsualna a thleng nual a, 33-minute red flag period-in race kal tluang lai a tikhaihlak.
Autodromo Hermanos Rodriguez tlankawng kha hmun sang tak, tuifinriat zawl atanga sang derh dawrh a ni a, chuap emaw lung emaw lama harsatna nei tan chuan thawkna kawngah harsatna tawh theihna khawpa boruak panna hmun a ni a, chu erawh driver hrisel theh thawhte chetsual pheng phung chhan ni lo turah ngai ila!
Kum 1953 hnu lama Italian champion ni leh thei hmasa ber Kimi Antonelli kha a champion rualin a tap lo thei lo a, intlansiak zawha a thusawiah, “Sawi tur ka haihchham. Tuna thil thleng chiah hi ka zirchiang dawn mek,” a ti!
Sawizamwin, “Season awihawm loh kan hmang a; vawiin bika Max leh Lewis-te nena lawmman semna dawhsan kan luahho ngawt pawh hi ka tan chuan a mak thlawt a, hma hun zelah pawh anni nena inbeihna kan chhunzawm ka beisei.
“Tunkar boruak hi a sang zual a, mahse, kan mamawh point kan thawkchhuak thei hi ka hlim a, season la bang zawng chu kan enjoy thei ta e,” tiin mipui hmaah a dinhmun a sawi chhuak.
Kartawp November ni 6-8 hian Brazil rama Interlagos tlankawngah Sao Paulo Grand Prix hmangin Formula One driver-te an intlansiak leh dawn a, champion chiang tawh a nih avangin a boruak dai deuh hlek tawh dawn mah se position dang inchuhna a la tawp loh avangin season tawp lam boruak hot tak kha a la kiam chuang lo tura ngaih a ni!