A ruka state capital sawn tumah ZPM sawrkar puh
Mipui rawn lo leh puangzar loin Mizoram state capital chu Aizawl atanga Thenzawl-a sawn tumah MNF hruaitu Zodinpuia chuan ZPM sawrkar a puh.
Zirtawpnia Mizo Hnam Run-a inkhawmah MNF general secretary Zodinpuia chuan, sawrkarin peace city project a buaipuinaah thu zep ruk a nei nia sawiin, “Chief minister Pu Lalduhoma hian sawrkar laipuia sum dilna atan Mizoram state capital Aizawl chu sawn turin ngenna a lo thlen reng a, hei hi tun thengin mipui hmaah a zep tlat a ni,” a ti.
Kumin April 24 khan sawrkar laipui Housing and Urban Affairs ection officer (AMRUT-IIB) Seema Rani chuan Mizoram chief secretary leh New Delhi Mizoram House resident commissioner hnenah, “shifting of state capital from Aizawl to Thenzawl, Mizoram” tiin, detail project report siamna tur lehkha a thawn tih a sawi a. Hei bakah hian sawrkar lehkha an hmuh theih dangah pawh Mizoram state capital sawnna tur thu hi a chuang tih a sawi.
“Hemi chungchangah hian chief minister chuan Aizawl khawpui tawt lutuk tih ziaawmna tura ‘peace city’ din tum a nih thu bak mipuiah puanzar a la nei loa, Mizoram leh Aizawl mipui rawn loa Mizoram state capital Aizawl a ruka sawn tumna lo awm reng hi sawifiah turin chief minister ka ngen a ni,” Zodinpuia hian a ti.
A ruka state capital sawn tumah ZPM sawrkar puh
