A sipai hmun beihah India-in Pakistan puh, lehlamin pha

A sipai hmun beihah India-in Pakistan puh, lehlamin pha
India chuan drone leh missile hmanga a sipai hmun pathum beiah Pakistan a puh a, Islamabad-in a pha thung.
Indian Army chuan a awp chin Kashmir-a Jammu leh Udhampur leh Punjab-a Pathankot-a an Pakistan-in an sipai hmun beih a tum chu an lo tihhlawhchhamsak niin a sawi.
Ningani zanah khan India awm chin Kashmir-a Jammu khawpuiah chuan thil puak ri pawh a awm a, êng tihthim vek (blackout) a ni bawk.
Pakistani defence minister erawh chuan heng beihnaah hian inrawlhna an nei lo niin BBC a hrilh ve thung.
“Kan tel lo, eng thil mah thil tha lo ti zawngin kan ti lo,” tiin Khawaja Asif-a chuan a sawi a. “Engmah kan kap lo a, kan tel lo a ni,” a ti.
Ningani chawhma lamah khan India chuan Pakistan-in boruaka invenna a neih an kap fuh niin a sawi a, Islamabad-in Nilaini zana sipai hmun beih a tumna pawh an tihtlawlhsak niin a sawi bawk.
Pakistan hian a hmain India-in missile hmanga Nilaini tuka Pakistan leh an awp chin Kashmir a kah chu ‘tul lo taka nawrna’ tiin a dem thu a lo sawi tawh.
India-in Nilaini khaw var hmaa a thenawm ram a kah hi khawvel ram hrang hrang hruaitu leh UN pawhin inbengdai tura a ngen lai taka a tih a ni.
Inbeihna leh laipui hmanga ramri hrula an intawngna chuan nuclear ralthuam nei ram pahnih inkarah indona nasa zawk a chhuak ang tih hlauhna a lian hle.
Tun tum thil thleng hi kum 20 chuang hnua ram hnihte inkara inbeihna a thlen nasat ber tum a ni mek.
India chuan thla hmasaa a awp chin Kashmir-a helhovin khualzin an beih phuba lak nan Nilaini tuk khan ‘mi firfiakte hmun’ pakua an bei tih an puang.
Pakistan chuan Indian-ten tlangram khua, Pahalgam-a civil mi 26 thattu helho puitua a puhna chu nasa takin a pha.
Heng lai biala kum tam tak hnua civil miten beih an tawhna lian ber hian an inkar a tisosang hle a. Thi zinga a tam ber hi Indian khualzin an ni.
Indian awp Kashmir-ah hian Indian rorelna duh lotu hel pawl an tam hle a, mi sang telin an thih phah tawh.
Kashmir hi kum 1947-a British-in India a then hnu atang khan ram pahnihte intihbuaina ber a ni a, a pumin an ram ve veah an chhal a, vawi hnih an indo phah tawh.
Nilaini tuka India-in ‘Operation Sindoor’ tia a hming a vuah a kalpui hnuah hian khawvel ram hruaitu tam takin inbengdai turin an ngen a. Hetih lai hian Ninganiah pawh khan ram pahnihte hi sipai chakna hmang zuiah an inpuh nasa hle.
Pakistani sipai thupuangtu chuan hmun tam takah India-in drone a kah chhuah an kah thlaksak tih a sawi.
“Nizan khan India chuan nawrna chhunzawmin hmun tam takah an drone ranw thawn luh hmuh a ni,” tiin Lt Gen Ahmed Sharif Chaudhry chuan a sawi a. “Lahore, Gujranwala, Chakwal, Rawalpindi, Attock, Bahawalpur, Miano, Chor leh Karachi bulah te a ni,” a ti.
Sindh province-ah civil mi pakhat thi awmin Lahore-ah sipai paliin hliam an tuar niin a sawi.
Lahore-a US consulate chuan thawktute chu an hnathawhna hmunah himna dap turin a ti.
India chuan tha a thawh lehna hi Pakistan-in zan lama ‘hmar leh khawthlang lama sipaite beih a tum vang’ niin a sawi.
“Thu rintlak tak kan dawn dan chuan Lahore-a Air Defence system chu tihchhiatsak a ni,” tiin defence ministry thuchhuah chuan a siam a. Pakistan chuan a pha thung.
Ram hnihte hian sawi dan hran an nei ve ve zel a, a finfiahna tak a awm thei lo.
Indian Foreign Secretary Vikram Misri chuan Ningani zan khan Delhi-a thuthar lakhawmtute a kawmnaah, “Kan awm danah hian inbengdaih kan ngai lo, a hmaa inepna boruak awm tawh kan chhang let mai chauh a ni,” a ti.
Hetih lai hian thi leh hliam an pung zel a. Pakistan chuan Nilaini tuk atanga India-in a beihnaah mi 31 thi leh hliam 57 an awm tawh tih a puang.
Indian sipaite chuan Pakistan-in ram an inchuh lai, Kashmir-a silai a hmeh puah mi 16 an thi a, heng zinga pathum chu hmeichhia niin naupang panga an awm bawk tih a sawi.
April 22-a Pahalgam-a beihna thlengah khan India chuan eng pawl tih nge a la sawi lo va; mahse, May 7 khan Pakistan-a Lashkar-e-Taiba hel pawl nena inzawmte tih a nih erawh a sawi thung.