BTS member V chu South Korean sipai a inziak lut turin a inpuahchah mek a, thla 18 chhung sipaiah a tang dawn a, a sipai luh hmaa fans tana social media Weverse-a a thu post-ah chuan, “Ka ngai dawn hle mai che u. Tih tak takah chuan ka ARMY te tan hriatreng tur thil hlimawm tuna han hnutchhiah mai tur che u ka nei lo hian min tihrehawm hle a ni…ARMY te hmuh loh hi thil harsa ber a ni. Dam takin thla 18 hnuah ka rawn kir leh dawn a, chuvangin ARMY te kha lo inenkawl tha ula, nitin hlimna tur thil inzawng a nih chuan hetah hi ka awm e! Ka rawn kir leh ngei ang!” a ti.
V, kum 27, hian a selfie hrang hrang a post tel bawk a, a sipai luh hmaa a lu a nawr kawlh thlalak te pawh a tel. V hian a music video thar ‘Blue’ a tlangzarh deuh chauh kha a ni a, he hla hi a debut album Layover atanga a single palina a ni a, he album-ah hian ‘Love Me Again,’ ‘Slow Dancing,’ (a piano version pawh a tichhuak), ‘For Us’ leh ‘Rainy Days’ te awmin, album hi September ni 8-a a tlangzarh tawh kha a ni.
K-pop supergroup BTS label Big Hit chuan BTS member pali RM, Jimin, V leh Jung Kook te pawhin sipai tan an tum hnai tawh tih an lo puang tawh a, BTS member dang Jin, J-Hope leh Suga te chu an lo inziak lut tawh a, Big Hit chuan BTS te hi member kimin 2025-ah an rawn comeback leh thei dawn chauh tih an lo puang tawh bawk a ni.
South Korea-ah hian mipa pangngai te chu sipai-ah thla 18 tal an tan ngei ngei a ngai a, kum 28 an pelh hma ngeiin sipai-ah hian an tang tan tur a ni a, BTS pawh hi nikum October atang khan member thenkhat sipaia an tan avangin group angin an che chhuak tawh lo a ni.
A sipai tan hmaa fans tana V lehkhathawn
