n Iran leh US inkara chawlhkar hnih chhung inkahhai chu tha taka kalpui leh Strait of Hormuz hawn a nih theih nan ‘tih tur tam tak’ a la awm thu a sawi.
UK prime minister hian Nilaini khan Gulf tangrual ramte tlawh turin Saudi Arabia a thleng a, inremna siamna thlawp leh vawnhimna tura palaite hmalaknate a sawipui.
Tuialhthei leh boruakalhthei phurhna siam thatna tura lawng kawng pawimawh hawn leh chuan UK-a thil man ‘a titha leh dawn’ tih a sawi.
Inkahhai hi US President Donald Trump-a’n Iran-in indo tihtawp leh Strait of Hormuz a dan tihtawp a remtih loh chuan ‘zan khat thila nuai chimih veka a vau’ hnua siam a ni a, Downing Street chuan ‘inbengdai zel turin’ a ngen.
Sir Keir-a chuan inkahhai puan a nih hnuah ‘boruak hahdam’ a awm tih sawi a; mahse, a muanawm ta vek tih nan ‘a la hma’ tih a sawi bawk.
Iranian chanchinbuten tuialhthei phurten Strait an paltlang tawh loh thu an an tar lan lai leh Israel-in Lebanon-a khawmuala beihpui a thlak tan atanga ‘a chet nat ber’ tum a thlen thu an sawi laia a sawi a ni.
Strait kaltlanga tanker phalsak hi Iran leh US inkara inkahhai puan theihna pawimawh tak a ni.
Sir Keir-a chuan Taif-a King Fahd Air Base-a UK leh Saudi mite hnena thu a sawinaah, “Hna thawh tur tam tak a awm a, in duh anga inkahhai nghet a nih theih nan leh kan duh ang muanna a thlen theih nan hna tam tak thawh tur a la awm a ni,” a ti.
“Khawvel hmun hrang hranga nghawng nei Strait of Hormuz kaihhnawihah pawh tih tur tam tak a la awm bawk,” a ti.
Sir Keir-a hi Zirtawpniah UK-ah a kir leh dawn a, a zin hi inkahhai puan hmaa ruahman tawh a ni.
Kar hmasa khan UK hian ral atanga tel theihna intawhkhawm buatsaihin ram 40 chuang aiawhte chuan indona a tawp hnua Strait-a him a awm theih nana pawl din tumin hma a la a. Thawhlehni khan sipai kaihhnawih ruahmanna siama intawh khawm a awm leh bawk.
Iran leh US chuan Thawhlehni khan inkahhai puan an remti a, hei hi Trump-a’n Iran-in inremna a siam theihna tura hun tiam a ruat a tawp hma darkar khat awrh a la awmah a ni.
Truth Social-ah Trump-a chuan inkahhai hi ‘Islamic Republic of Iran-in Strait of Hormuz HAWN VEK, HAWN NGHAL leh HIM TAKA KAL THEIH a remtih vang’ niin a tar lang.
Hetihlai hian Iranian Foreign Minister Abbas Araghchi-a chuan Iran laka beihpui thlakna tihtawp a nih chuan inkahhai a remti dawn tih a sawi ve bawk a. “Kar hnih chhung chu Strait of Hormuz kaltlangin him taka kal theih a ni ang,” a ti bawk.
Indona hi February thla atang khan tan a ni a, US leh Israel chuan Tehran-in nuclear ralthuam siam tura hma a lakna a tichak nia an ngaih avangin Iran chu an bei a ni.
A taka inkahhai turin tih tur a la tam – UK PM Sir Keir
