A tawp thleng thei an tam lo
Synod Revival Camping Centre leh Youth Recreation Centre-a ruihhlo ngaite chhanchhuahna camping neihah a tirah mi sang chuang lut mah se, a tawp thleng thei tur an tam loa, mi 200 chuang awrh an ni.
Chhanchhuahna camping-ah hian camper tam laiin mi 1005 an tling a. Synod Revival Camping Centre (SRCC) Sihphir Neihbawih-ah hian tunah mi 120 an awm mek. Camper-te hi kum 18 leh 67 inkar an ni. Kumin May 5 khan lutin vawiin – June 5 hian an chhuak dawn.
SRCC-ah hian a tirah an len loh em avangin Youth Recreation Centre Falkland-ah chhanchhuahna camping hi kalpui tel niin, mi 112 an awm mek a ni. Camping buatsaihna atan hian cheng nuai 40 vel sen a ni tawh.
SRCC hi Nilaini khan Excise & Narcotics minister Lalnghinglova Hmar chuan a tlawh a, camping buaipuitute nen an inkawm bakah camping kaihhnawih a tul apianga hman turin sumfai a hlan.
Minister chuan ruihhlo do kawngah sawrkar leh khawtlangin theihtawp a chhuah chungin, kohhran a tel chuan lian zawk leh awmze nei zawkin hma a lak theih thin tih a sawi.
“Tuna camping boruak atangin ruihhlo ngai chhanchhuah kan mamawh zia a langchiang a, kohhran pawhin thildang thlauhthla chuang loin helam hawi telh telh se ka duh a ni,” a ti.
Minister hi Synod Revival Committee director Rev JC Lalramliana hoin an lo dawngsawng a. Camper-te hi an chhuahna tur zawnsak vek tum a nih bakah an chhuah hnuah pawh in lama tlawh chhuah vek tum a ni tih an sawi
A tawp thleng thei an tam lo
