A thlawnin lung na zai sak
Corporate social responsibility (CSR) kaltlanga nikum November-a Lungleia lung lam leh cancer natna a thlawna inentirna neih hmalakna kal zelah phai hospital lama zai ngai lung natna nei mi 10 chu Shri Ramachandra Medical Centre, Chennai-ah a thlawna zai leh an ni a, damdawi ina an awm man leh an inenkawlna man hi a thlawna tih sak an ni.
Damlo zai ngaite hi anmahni hruaitute nen April 6 khan Chennai an thleng a, Shri Ramachandra Medical Centre-ah admit nghal an ni. Hlawhtling taka zai niin, an zinga 9 chu April chhung khan Mizoram lo thlengin, May 7 khan a la awmchhun pakhat a lo haw leh a, an vaiin Mizoram an thleng tawh a ni. Tun tuma zaite hi hmeichhia 5 leh mipa 5 an ni a, thla 8 atanga kum 54 inkar an ni.
CSR kaltlanga free clinic hi senior cardiologist, Sri Ramachandra Medical College and Research Institute Chennai-a head of cardiology Dr JSN Murthy leh Lunglei bawrhsap kalchhuak ta Kulothungan A te hmalakna a ni a; Sri Shankara Heart Foundation, Mathew Foundation, Muthi Trust, Renyl Foundation leh mimal pakhat Subramaniam ten sum thahnem tak an thawhkhawm a. An inzaina, damdawi ina an awm man leh an kal leh haw na zawng zawng hi a thlawna tih sak niin, ni 90 chhung ei tur damdawi an dawng vek bawk.
He hmalakna kaltlang hian kumin March khan naupang 5 hlawhtling taka zai an lo ni tawh a ni.
A thlawnin lung na zai sak
