A tum 15-na atana record break-tu Duplantis!
Pole vault record siam thulh thei lo Sweden superstar Armand Duplantis chuan tunkar Ningani khan world record thar a siam leh a, metre 6.31 zeta sang zuankhum chungin a vawi 15-na atan a hmaa pole vault world record a lo siam tawh a khum leh ta a ni!
Vawi hnih lai Olympic gold champion ni tawh bawk Duplantis hian an ram Sweden-a indoor pole vault-only event Mondo Classic an tihah record thar hi puitlin lehin, Uppsala khuaa IFU Arena-ah khawvel mipa pole vault a awpbehzia a lantir nawn leh.
A first attempt-ah vek 5.65m, 5.90m leh 6.08m a khum a, chu mi chinah chuan duhtawk ngah loin kum 26 mi hian an hmawlh kham (bar) chu world-record ding lai tluk turin 23cm-a san leh turin tournament huaihawttute a ngen a, chu pawh chu a khum leh ta a ni.
Tun kha an ram chhung ngeia Duplantis-a’n world record a break vawi hnihna niin, a hmasa zawk chu nikum June thla Stockholm-a 6.28m a zuan khum kha niin, kha kha kum 2025 chhunga world-record thar tum li a siam zinga pakhat a ni.
Hminglema ‘Mondo’ tia an koh thin Duplantis hian chawimawina pawh a khum chho mawlh mawlh kal mek a, Ningania a record dinglai a khum lehna pole vault ngau ngau bik intihsiakna lian Mondo Classic indoor meeting pawh kha a hming chawia phuah ngat a ni!
A chipuite hmaa record a break leh thei chu a inchhuang hle tih sawi chungin, “Kei leh ka chhungte tana zuang ka nih rualin i tan, Sweden tan leh min thlawptu zawng zawngte tana zuang ka ni,” a ti.
Sondre Guttormsen of Norway chuan 6.00m puitlin chungin pahnihna dinhmun a luah a, kumin chhunga six-metre vault a zuan tum hnihna a ni nghe nghe.
5.90m pel vek chungin American pahnih Zachery Bradford leh Sam Kendricks bakah Australian Kurtis Marschall-te chuan pathumna atanga pangana an hauh.
Mondo Duplantis lo lan hmaa world record siam thei hnuhnungber Renaud Lavillenie of France chuan kum 2014 khan 6.16m zuangin world record a siam a, a hnu lam zawng chu Swede chanpual a ni chho ta a ni.
Major gold chin a chuh phak awrh kim vek tawh Mondo hi Paris 2024 title a humhim leh rual khan kum 64 chhunga Olympic pole vault title humhim thei hmasaber a ni.
Olympic leh world champion Duplantis hi US-a piang ni mah se a nute ram Sweden hminga kal a thlang ta zawk a; kum 2019 Doha khawpuia World Athletics Championship zawh hnu atang khan major final-ah tlawm a nei leh ta miah lo!
Kha mi kum khan rawlthar mai la ni chungin American Sam Kendricks ngam loin gold a awrh zo lo.
Duplantis-a world
record zinkawng
6.17m – 8 Feb 2020 (Torun, Poland)
6.18m – 15 Feb 2020 (Glasgow, UK)
6.19m – 7 Mar 2022 (Belgrade, Serbia)
6.20m – 20 Mar 2022 (Belgrade, Serbia)
6.21m – 24 Jul 2022 (Eugene, USA)
6.22m – 25 Feb 2023 (Clermont-Ferrand, France)
6.23m – 17 Sept 2023 (Eugene, USA)
6.24m – 20 Apr 2024 (Xiamen, China)
6.25m – 5 Aug 2024 (Paris, France)
6.26m – 25 Aug 2024 (Chorzow, Poland)
6.27m – 28 Feb 2025 (Clermont-Ferrand, France)
6.28m – 15 Jun 2025 (Stockholm, Sweden)
6.29m – 12 Aug 2025 (Budapest, Hungary)
6.30m – 15 Sept 2025 (Tokyo, Japan)
6.31m – 12 Mar 2026 (Uppsala, Sweden)