Site icon The Aizawl Post

A vawi khat nan Italy an chak

Thawhtan zan khan Europe atanga World Cup 2026 khel tur zawnna khelh chhunzawm a ni a. An match hmasa berah Norway lakah 3-0 ngwta tlawm Italy an insiamtha a, an mikhual Moldova chu 2-0 in an hneh. Italy chak rual hian vawi thum chak zawn tawh Norway in hnehna an chang ve leh bawk a, World Cup an hnaih deuh deuh zel.
World Cup-ah vawi li ngawt champion tawh Italy hian MAPEI Stadium-ah Group I-ah an hnuaia awm chhun Moldova an mikhual. Norway laka tlawm hlimhlawl an nih vangin an mualah chak ngei an tumruh hle a, Moldova hneh ngei tumin tan an khawh. An mualah khel chhe lem lo viau mah se beisei angin goal erawh an thun tam thei lo thung.
Chak mamawh Italy tan hian Giacomo Raspadori chuan minute 40-naah hmahruaina goal a thun. Goal thun belh tum viau mah se an hlawhtling zo rih lova, 1-0 a hmahruai chungin chawlhlawk an hmang.
Chawlhlawk hnu lamah Italy an khel tha chhunzawm a, goal an thun belh thuai. Second half tan atanga minute ngana lekah Andrea Cambiaso chuan an goal hnihna thunin an hmahruaina a tizau. Darkar khat hmaa an goal thun bak hi hun tawp thlengin an thun belh thei lova, an mualah hnehna changin point thum an hmu a. Manager Luciano Spalletti hnuaia an khelh hnuhnung berah hnehna an chang.
Moldova an hmachhawn hma lawk khan Italy manager Luciano Spalletti chuan a hna a bansan tur thu a sawi lawk tawh a, a sawi lawk ang ngeiin Moldova an hmachhawn hnuin a hna a bansan zui nghal. Italy hian Spalletto hmunruak luahtu tur an zawng nghal a, EPL-a Leicester City lo champion pui tawhtu Claudio Ranieri chu an manager thar ni tura an duh ber ni bawk mah se an ruai thei ngei dawn em tih a la chiang thei rih lo thung.
Italy manager atanga bang ta Luciano Spalletti hian kum 2023 atangin Italy manager hna a thak tan. Euro 2024-ah Italy hi a kaihruai a, beisei angin hlawhtlinna erawh a chanpui thei lo thung. A tum leh beisei anga Italy hi hma a sawnpui theih loh thu a zep lova, hmasawnna thlenpui lova a hna a bansan a rin ngai loh thu a sawi. Italy manager nih chu thil chakawm loh tak a nih thu sawiin, ama thlaktu tur tunge tih la chiang lo mah se Spalletti hian a vaukhan lawk.
Norway an chak zel
World Cup 2026 khel tur zawnnaa chetha a, vawi thum chak zawn tawh Norway an chetha chhunzawm a. Thawhtan zan khan mikhual an nihna hmunah Erling Haaland goal thun hmanga hnehna changin point thum an hmuh belh.
Group I a hmahruai mektu Norway hi Estonia hmachhawn turin A. Le Coq Arena-ah an leng lut. Mikhual an nihna hmunah beisei angin an khel tha tawk lova, goal thun an harsat. Darkar khat chuang zet goal an thun theih loh hnuin Erling Haaland chuan minute 62-naah hmahruaina goal a thun. Haaland goal thun hi Estonia lakah an chakpui a, an hmahruaina an sawh nghet.
Estoni laka goal thuntu Haaland khan Norway tan inelna hrang hrangah vawi 43 khel tawhin, goal 42 zet a thun a, ram tan a chetha rem rem hle. 2019 atanga ram tan khel tan Haaland hi Norway tan goal thun hnem ber a ni der tawh a. A hnuai chiaha mi Jørgen Juve aiin goal 9 ngawtin a thun tam tawh zawk a. Norway tan goal thun hnem ber record a siam hi khum a harsa hle tura ngaih a ni.
Group I ah hian khelh li atanga point hmuh theih zawng zawng hmu vekin Norway in hma an hruai zui zel a. Italy in khelh hnih atangin point thum an hmu a. Pahnihna Israel in point ruk an hmu ve tawh bawk.

Exit mobile version