Champhai district-ah chuan inthlanpuia a vawi khatna atan, hmeichhe hlang duty-na tih loh polling station dang zawngah silai keng police pakhat theuh tal an duty vek dawn.
District election hotute sawi danin, hmeichhe hlang duty-na ‘Pink Polling Station’ 9 tiam loin, polling station tinah armed police an duty tel dawn a. He hmalakna hi venhimna lama hlauhthawnawm a awm vang niloin, inthlan kaihhnawihah venhimna tha zawk neih a nih theihna tura hmalakna a ni.
Kum danga la tih ngai loh angin kumin inthlana duty-a chhuak turte tan ‘Welcome Kit’ buatsaih a ni a. Welcome kit-ah hian polling party-te mamawh hrang hrang – toothbrush, toothpaste, shampoo, damdawi, first aid kit, thosi hlo, sahbawn leh ORS-te dah a ni.
Champhai district-ah Assembly bial pathum – Champhai South, Champhai North leh East Tuipuia polling station 84 awm hi pan harsa lutuk awm lo vek niin November 6 khan an kalna tur hlan dan azirin polling party-te hi a tahtawlin an chhuak a. A phur turin bus 6 leh maxi cab 71 ruahman a ni.
Hmeichhe hlang duty-na hi Assemby bial pathum awmah bial tunah polling station pathum, a vaiin PS pakua siam a ni a. Final electoral roll-a tarlan danin, Champhai district-ah hian voter 57180 an awm a, 27880 chu mipa niin, hmeichhia 29300 an ni.
A vawikhatna atan silai keng police duty dawn
