Belgium ramah pawh defending world champion Max Verstappen khing thla zo an awm lo leh a; Pathianni Spa-Francorchamps tlankawnga Belgian Grand Prix-ah hnehna chang lehin, tun kha F1 Grand Prix race-a Formula One championship hmahruaitu ni mek vawiriat chak zawnna ni tawhin, car intlansiak level sang bera chak zawn rei record ding lai tluk turin Dutch driver khan vawikhat chak leh a la mamawh.
Belgium rama Spa khaw tlankawnga a hnehna sualchhuah leh nen Red Bull driver khan Formula One intlansiakah tum 45 hnehna a chang tling chiah a, season kal laia race vawi 12 an zawh tawha a vawi 10 chakna niin, tum hnih dang chu a Mexican team-mate Sergio Perez-a chanpual a ni.
Season liamta nen belhkhawmin Red Bull team chuan a zawnin intlansiak tum 13 an chak zawn a, kum 73-a upa Formula One world championship chanchina season tir lam intlansiak tum 12-a chak vek thei awmchhun an ni.
Kum 1988 daih tawh khan Ayrton Senna leh Alain Prost chhawr chungin McLaren chuan intlansiak hmasa vawi 11-ah hnehna an chang a, kha record ding rei tak kha an nihrualpui hnuah Pathianni khan an lehpel zui ta a ni.
Pathianni Belgian Grand Prix-ah Red Bull ‘one-two’ lai kan thlirliam leh a, Verstappen-a team-mate Perez chu pahnihnaah thlengin, gear box thlak zin hrinchhuah hremna (five-place grid penalty) avanga parukna atanga tlan-chhuak Verstappen chuan championship kal laia a hmahruaina sawhnghet zelin, amah hnaihbertu Mexican lakah point 125 zetin hma a hruaifal ta a ni.
Spa-Francorchamps tlankawnga Red Bull driver pahnih inum kha chequered flag vai a nih laiin second 22.3-in an inthlau a; Belgium ramah Verstappen a chesual tak tak thei lo a ni ber e!
Ti hian, Belgian Grand Prix hnuhnung vawithumah double world champion Verstappen hi a chak fai vek a; chu’ng zingah chuan nikuma 14-na daih atang daiha tlanchhuak chunga hnehna a sualchhuah kha a tel.
Tun Pathiannia a chak leh hnuah Red Bull driver chuan car ropui kawltu an ni tih an inhriatchian thu leh turn one-a chetfuh kha a pawimawh lai a nih thu sawi chungin, “Kha mi hnu lamah kha chuan chesual loa hmaa mite lehpelh leh dik taka chet lak (move) kha a ni tawh mai,” a ti.
Season kal laiah tlan hmabak la tam tho bawk mah se Dutchman hi a zawna title pathum la tling thei turin rinkai ber a ni lo thei lo a, thil chiang lo la awmchhun chu khawi tlankawngah ber nge title a hlawhchhuah leh dawn tih hi a ni deuh tawh mai e!
Pole atanga Ferrari car nena tlan-chhuak Charles Leclerc chuan lawmman semna dawhsan hniam ber luah turin palinaa thleng seven-times world cham-pion Lewis Hamilton a hmakhalh thei hram a; season bul tan fuh lo Briton rawn chetha chho leh khan palinain a ken tel point bakah fastest lap lak manah bonus point khat a thawkchhuak tel a, driver standing lamah Mercedes driver hian palina a luah kal mek bawk.
Tun kha season kal laia Red Bull ‘one-two’ vawinga tehreng kan hmuh tlinna ni tawhin, Belgium tlankawngah hremna avanga bul tan hma thei lo chungin Verstappen a inringtawk a, race engineer Gianpiero Lambiase nena radio kaltlanga an inbiaknain chu chu a tichiang hle a ni.
A zawna vawiriat chak zawn thei Verstappen !!
