Opposition tangrual te chuan Congress president Mallikarjun Kharhe kaihhruaina hnuaiah Adani group chu Joint Parliament Committee emaw CJI-appointed panel emaw hmanga chhuichian an phut.
Hei vang han parliament a rorel a mumal hleithei lo va, House pahnihah Question Hour laiin Adani issue sawiho ngiatin opposition te an aurual a ni.
Parliament Budget Session hi January 31 atang khan tan niin April 6 thlenga neih tur niin ni 66 chhungin thutkhawm
um 27 neih tura ruahman a ni.
Leader of the Opposition leh Congress president Mallikarjun Kharge hovin opposition MP pakua te chuan rule 267 behchhanin Adani group te sumdawnna chungchang chu sawiho an ngiat a. Adani te hmalakna chuan Indian small investor maktaduai tel te rim taka an thawhchhuahsa sum chingpen theiin a siam a, LIC investment te pawh a him lo thei an ti a.
Mahse, Chairman Jagdeep Dhankhar chuan opposition te notice chu hnawlin order ah a tel lo a ti a, hei hian opposition te chu thinrimin a siam a ni.
Dhankar chuan House a thu member te chu insumkar tura ngenin mahse MP te chuan an beihchunzawm zel avangin rorelna mumalin a kal hlei thei lo.
Opposition te hian Joint Parliament Committee emaw Supreme Court kaihhruaina hnuaiah Adani Group crisis chu chhui an ngiat a. Chumai ni lovin chhui a nih pawhin public money kaihhnawiha nih tlat avangin nitin chhui chiannaa thlen chin report pek an ngiat bawk.
Shiv Sena MP (Uddhav Thackeray faction) Priyanka Chaturvedi chuan Rajya Sabha-ah rule 267 hmangin Adani vs Hindenburg chu Business khawih lova sawiho a ngiat a. Chaturvedi chuan, “Public money tam tham zet mai chu Adani group ah hian SBI leh LIC kaltlangin khawih chet theihloh a awm a ni. Hei vang tak hian House in kan sawiho ngei a ngai a ni” tiin a sawi.
Leader of Opposition Mallikarjun Kharge pawhi, “Joint Parliament Committee emaw Supreme Court CJI kaihhruaina hnuaiah chhui chian ngei a ngai a ni” tiin a sawi bawk.
Sawihona neih kan duh a, kan dilna te hnawlin a awm a. Issue pawimawh sawi lan kan duh a, hun min pe duh lo. Miretheite sum chu LIC, SBI ah te leh national bank ah te dah a ni a, heng sum te hi thlanbik company te hnenah pek an ni, tiin Kharge chuan a sawi.
Prime Minister Narendra Modi chuan Union Ministers Amit Shah, Rajnath Singh, Anurag Thakur, Nirmala Sitharaman, Pralhad Joshi, Piyush Goyal, Nitin Gadkari, Kiren Rijiju te nen an strategy tur ngaihtuahin an inhmukhawm ve thung.