ADC bial 5-ah MNF kan chak vek ka ring – Robert Romawia

Autonomous District Council pathuma MLA seat 5 awmah MNF an chak vek a rinawm tih MNF adviser Robert Romawia Royte chuan a sawi.
Thawhtannia Siaha Bazara Siaha District MNF street campaign buatsaih a hmanpuinaah MNF adviser chuan Mizorama MLA bial 40-a an boruak san chak zia thlirin MNF-in hneh taka chakna a chan a ring tih a sawi a. District Council pathuma MLA seat 5 pawh MNF-in an lak vek theih nan tan an la chho mek a, ADC area-a mipuiin ruling party MLA an duh a, ADC area bial 5-ah an chak vek a rinawm tih a sawi.
District Council & Minority Affairs minister Robert Romawia chuan ADC-te chu duhsak takin state sawrkarin sum a pe thin a. Sum an pek dan ni lo, dan kalha sum hmang an awm chuan dan an hmachhawn zel a ngai dawn tih a sawi. “MADC-in dan kalhin post awm loah mi tam tak election campaign nan appointment a pe nia report awm hi chhuichian a ni anga, thil tidik lo an awm chuan action lak a ni ang,” a ti.
Covid a leng vanga state sum hmuh tur thahnem tak an hmu lo chungin, Mizoram dung leh vangah hmasawnna hnathawh a tam em em a, GST atanga sawrkar sum hmuh pawh Congress hunlaia an hmuh tam ber letin a pung tih a sawi a. “Hei hi hmasawnna hnathawh tam zia tichiangtu a ni,” a ti.
Heti khawpa hmasawnna hna sawrkarin a thawk nasa chungin, Mizoram chu India ram state zinga leiba nei tlem ber dawttu a ni tih minister hian a sawi a. Congress hunlai khan Mizoram sawrkara thleng ngai lo sum lapse pui (mega lapse) tum hnih a thlen thu leh hnamin a tawrh nasat thu a sawi a ni.