ADC-in direct funding an hmuh
theihnan kan lo remtihpui dawn
– Adviser to CM
MLA inthlanpui hmaa an party-in a lo tiam tawh angin, sawrkar laipuiin Autonomous District Council-te tan direct funding pek leh pek loh state sawrkar ngaihdan a rawn zawh hunah, an lo recommend pui dawn tih adviser to chief minister (Political) Lalmuanpuia Punte chuan a sawi.
Nilainia Lawngtlaia hun an hmanah ZPM hruaitu Lalmuanpuia Punte chuan, ZPM-in policy an dah pawimawh hle a, an lo sawi tawh angin Autonomous District Council-ah pawh direct funding tha taka an hmuh an duhpui a, MLA inthlan hma daih tawhin ZPM Political Affairs Committee chuan ‘ZPM-in sawrkarna kan chan hunah sawrkar laipuiin ADC-te direct funding chungchang min zawh chuan positive comment kan pe ang,’ tiin an pass sa vek tawh tih a sawi. “Tunah kan lo sawrkar ta a, sawrkar laipuiin min rawn zawh phawt chuan ADC-te tan direct funding hi kan recommend ngei dawn,” a ti.
ZPM party chuan ram rorelnaa Pathian ram tundin tumin hma a la mek a, ram rorelnaa Pathian ram tungding tur chuan inhmangaih tawnna baka pawimawh a awm chuang lo tih Lalmuanpuia Punte hian a sawi. “Kan ramah party politics ruihchilhna in mipui thinlung hun rei tak a luah tawh a, party awmna inan loh avanga thenawm khawveng, u leh nau inbe hleithei lo kan awm fo thin. Nimahse kalphung thar mipui sawrkarah chuan mipuiin kan thinlung leh rilru puthmang kan thlak a ngai a, kan thenawm khawvengte leh party dangte pawh hmangaihna thinlung nen kan thlir thin tur a ni. Hei hi Bible min zirtir dan a nih avangin ram rorelnaa Pathian ram tundin a nih theihnan thil pawimawh tak a ni,” a ti.
ADC-in direct funding an hmuh theihnan kan lo remtihpui dawn – Adviser to CM
