Mizoram-a Autonomous District Council pathumin harsatna a tawh chhan chu ZPM sawrkarin a thutiam a hlen loh vang a ni tih BJP MLA K Hrahmo chuan a sawi.
BJP State office-a inkhawmah MLA hian, ADC pathumin sum lama harsatna an tawh chhan bul ber chu Pu Lalduhoma kaihhruai ZPM sawrkarin ADC-te a duhsak loh vang leh an thutiam an hlen loh vang a ni tih a sawi a. ADC area-ah hian Mizoram population atanga chhutin mi cheng zaa 17 an awm a, Mizoram state budget atanga ADC-ten an chan ve chu, sawrkar hmasate ang lo takin zaa 4 chiah a ni thung tih a sawi. Central-a BJP kaihhruai sawrkarin kum hmasa aiin duhsak takin Mizoram budget zaa 12.18-a a rawn tihpun sak laiin, ADC pathum tana zaa 4 chauh state sawrkarin a pe leh si hian ADC mipui hi ZPM sawrkarin a duhsak loh zia a lantir tih a sawi a ni.
“Tunhnaia chief minister-in Siaha DC office a hawnnaa a thusawi kha a dik tawk lo hle tih mipui hriatah ka puang duh a. CM hi tute nge figure dik lo lo hrilh thin anga, thudik tawk lo sawi tir thin ni ang,” a ti.
First State Finance Commission 2015- 2020 chhung khan Finance Commission ruahmanna aia tam ADC-te hian sum an dawng thin a, RE (revise estimate) pawh kumtin pek an ni thin tih K Hrahmo hian a sawi a. 2nd State Finance Commission 2021- 2026 chhungah erawh ZPM sawrkarin Finance Commission recommendation aia tam pek theih a ni tawh lo, a tih avangin RE a pe duh tawh lo tih a sawi.
Chutihlaiin, ADC-a MDC leh ex-MDC pension hlawh a beitham deuh tawh avangin state sawrkarah tihsan an dil a, Mizoram sawrkar chuan 2024 February 12 khan pawmsakin, Mizoram gazette-ah order a chhuahsak thlap tawh a, hemi thu pawh hi ADC-ah campaign auhla atan an hmang tawh tih a sawi a ni.
“Hetiang a nih avang hian ADC MDC-te hlawh leh ex-MDC pension hlawh pawh an sum neih sa atangin an inpe ve nghal a, nimahse, state sawrkar chuan kum 2024 ah leh 2025-ah pawh RE hi a pe duh ta chuang loa, chuvangin ADC pathum hian sum tam tak an bat phah ta a ni. Mizoram sawrkarin order chhuah lo se, hlawh pung kha an inpe loanga, Mizoram Gazette order meuh a awm avanga an sum neih sa hmanga hlawh an pek avangin sum an bat phah ta a, ZPM sawrkar hian ADC mipui hi bum loin, an thutiam hlen nise ADC hian sum harsatna em em an tawk dawn lo,” Palak bialtu MLA hian a ti.
Mizoram sawrkarin ADC-te inenkawl dan turah ruahmanna thar siama hma a lak meknaa, ADC-ten an budget atanga 60% salary expenditure atana hmang tur leh 40% capital expenditure atana hmang tura tih a tum chu thil tih theih tawh loh a ni tih sawiin, “State sawrkar pawh hian 2026- 2027 budget-ah capital expenditure atan 17.46% chauh a dah a, a bak 82.54% salary expenditure-ah a hmang a, 60% ah state sawrkar hian a tlahniam thei dawn em, tih pawh zawhna lian tak a ni. Chuvangin kan sawrkar hrawn mek hian a thil tih turah ngaihtuahna fim tak hmanga mipui hrek lo zawnga hma a lak thiam ka beisei,” a ti.
ADC sum harsatna tawh chhan ZPM sawr- karin a thutiam a hlen loh vang – K Hrahmo
