December ni 7-a Los Angeles-a neih tur, The Hollywood Reporter’s annual Women in Entertainment breakfast gala-ah Adele chu award ngaihhlut hlawh tak Sherry Lansing Leadership Award dawng tur a thlan a nih thu an puang.
He event hi entertainment industry-a milian leh VIP 750 chuang an tel thin a, sawmbik te tan chauha tel theihna niin, Sherry Lansing Leadership Award hi entertainment leh media lam che tha, midangte tana thawk hlawk leh huhang nei lian te hnena hlan thin a ni.
Hollywood Reporter co-editors-in-chief Nekesa Mumbi Moody leh Maer Roshan te chuan, “Kumin Women in Entertainment event-a Sherry Lansing Leadership Award Adele-i’n a dawng tur hi keini pawh kan phur hle a ni. Adele career hi chu sawi leh chuan pawh a ngai tawh lo a, khawvela ropui berte zing ami a ni a, hlaphuahthiam chungchuang, vocalist tha theih tawp, performer chungnung tak leh artist talent tawpchin nei lo a ni. Performer tha tehna sang taka kham tu a ni tih hian a sawikim ber mai awm e. A hlawhtlin tawhna- Grammy atanga Emmy leh Oscar thlenga a dawn tawh te hian chu chu a nemnghet a ni. Hei bakah hian a platform chu midang te fuihphur nan a hmang tangkai hle a ni. He award hi a phu takzet a ni,” an ti.
Sherry Lansing Leadership Award hi Hollywood studio-a hmeichhe zinga hotu dinhmuna ding thei hmasa ber, Paramount Pictures-a CEO lo ni tawh hming chawia sem thin a ni a, he award hi Charlize Theron, Jennifer Aniston, Reese Witherspoon, Oprah Winfrey, Barbra Streisand leh Viola Davis te pawhin an lo dawng tawh a ni.
Adele hi khawvela hmeichhe zaithiam ropui ber te zing ami niin, khawvel huapin a record maktaduai 120 chuang a hralh tawh a, Grammy Award 16, Emmy, HGolden Globe leh Academy Award te pawh a dawng tawh a ni. A studio album hnuhnung ber ’30’ chu 2021 khan khawvel huapa album hralh tam ber a ni. Tunlai hian Las Vegas-ah concert residency ‘Weekends With Adele’ a nei mek a, a Las Vegas residency pawh hi a hlawhtling hle a ni.
Adele-i’n Sherry Lansing Leadership Award dawng dawn
