Adviser to chief minister (finance) TBC Lalvenchhunga’n he hna hi bansan a dil a, mahse chief minister-in a pawm lo. Adviser to chief minister (finance) hian a hna a zawm leh dawn tih thu dawn a ni.
Aizawl West I bialtu MLA TBC Lalvenchhunga hian November ni 17-ah adviser to chief minister (finance) a nihna atanga banna a thehlut a, chawlhkar thum a chawlh hnuah he hna hi a zawm leh dawn a, kar leh lamah a zawm a rinawm tih thu dawn a ni.
December ni 2, Ningani zan khan TBC-a hi chief minister nen chief minister chenna inah an inkawm a, hemi zan hian an inkawm thu hi social media lamah chhiar tur a awm nghal. An inkawm hnu hian a hna a zawm leh dawn tih thu dawn a ni a, chawlhkar tharah office a kai leh a rinawm.
November ni 17-ah banna a thehlut a, a tukah Dampa bial by-election-a tling Dr R Lalthangliana lakluh niin, heta tel chief minister chuan amah betu thuthar lakhawmtute zawhna chhangin, TBC-a banna hi a pawm loh tur thu a sawi. Mahse TBC-a hian a hna a thawk zui chuang lo a, politics lama tuite ngaihven a hlawh hle.
Thu dawn danin, TBC-a hi chief minister-in a banna a pawm loh bakah party chhungah bang lo tura ngenna a tam a, a ban tumna pawmpuitu an awm lo tih theih khawpin bang lo tura ngen a ni.
November ni 20-ah ZPM PAC an thu a, TBC-a chungchang hi ngaihtuahin, amah pawhin a dinhmun a sawi a, chumi hnuah PAC hian lamkal intirin bang lo turin an ngen. Chumi hnuah ZPM-a an pawl pakhat Val Upa Council (VUC) member thenkhatin an len chilh a, anni hi VUC aiawh ni lovin, chief minister-in mimala a tirhte an ni. Anni’n bang lo tura an ngen bakah a bial chhunga ZPM hruaitute’n bang lo turin an ngen bawk.
A hmain chief minister hian lengah sawmin a lo kawm tawh bawk a, chutiang karah chuan December ni 4 zanah inkawm lehin, TBC-a pawhin bang lo turin thu a titlu ta tih thu dawn a ni.
Amah TBC-a’n office a kai loh chhung hian office staff-te chu bantir emaw chawlhtir emaw an ni chuang lo a, adviser to chief minister (finance)-in a hna a zawm hunah pawh mahni hna theuh thawk chhunzawm tura ngaih an ni.
Adviser to CM-in a hna zawm leh dawn
