Ningani zan khan Indian I League khelh chhunzawm a ni a, Mizo team neih chhun Aizawl FC chuan mikhual an nihna hmunah awlsam takin hnehna an chang a. Mualneitu TRAU FC chu 5-1 in an sawp.
Kalyani Stadium-a North East derby khelhah mualneitua tanga TRAU FC in bul an tan tha a, inkhel tan atanga minute 13-na lekah Robinson Singh chuan mualneitu tan hmahruaina goal a thun. Hma takah goal chhuah mah se champion hlui Aizawl FC an buai lo va, an khingpuite an chhang let nghal thuai.
Aizawl FC hian minute 16-naah penalty an hmu a, he penalty hi goal tun thei Lalrinzuala Lalbiaknia chuan a pet goal a, an si phurh a sut. An si phurh an sut hnuin AFC an khel tha chhunzawm a, goal an thun belh leh thuai. Minute 23-naah Rinzuala’n an goal hnihna leh hma an hruai letna goal a thun. Rinzuala hian season kal meka goal riat a thun tawh a, I League 2023-24-ah goal thun hnem ber dawttu a ni mek.
Chawlhlawk hnu lamah Aizawl FC an khel tha chhunzawm a, goal an thun belh leh thuai. Minute 51-na lekah Gerard Williams chuan an lamah ti-goal in AFC hmahruaina a tizau a. Hemi hnu hian Joe Zoherliana’n minute 53-na leh 57-naah goal thun belh zui leh a, 5-1 ngawtin an chak zui ta a ni.
TRAU FC lakah hnehna an chan leh tak vangin Aizawl FC hian khelh riat atangin point 14 an hmu a, panganaah an awm mek. Pahnihnaa awm mek Sreenidi Deccan nen an inkarah point thum chauh a tla zep mek a. AFC hian champion theih beiseina sang tak an nei.
AFC an chak nuamsa
